Cizîr de qeyûmî pêro parkê sûke teslîmê sazîyanê dewlete kerdê. Semedê nê kerdişanê qeyûmî ra, Şaredarîya Cizîrî nêeşkena parkan de xizmet bido şarî.
Qezaya Cizîrî ya Şirnexî de, verê weçînayîşanê 31ê adara 2019î û 31ê adara 2024î, qeyûman 22 parkanê sûke ra 18 parkî teslîmê sazîyanê dewlete kerdî. Çunke nê parkê sûke destê sazîyanê sey midurîyanê cendermeyan, polîsan, perwerdeyî û diyanetî de yê, şaredarîye bi hawayêko fermî nêeşkena xizmetê şarî bikero.
Parkê şaredarîye dayê Fermandarîya Cendermeyan a Cizîrî
Hemşaredarê Cizîrî Abdurrahîm Durmuşî derheqê rewşe de qisey kerd û va ke qeyûmî parkê sûke yê ke çimeyê pereyî yê, pêro dayê sazîyanê dewlete.
Dûrmûşî wina dewam kerd: “Pêro parkê Cizîrî teslîmê sazîyanê dewlete kerdê û meseleya ke ma tewr zaf zehmetî ci ra ancenê, na ya. Verî ke ma bameyêne serê karî, qeyûme Nazlî Demîre pêro parkê ke pere ci ra vejîno, dayê sazîyanê sey Midurîya Emnîyetî ya Cizîrî, Fermandarîya Cendermeyan a Cizîrî, Midurîya Perwerdeyî ya Cizîrî, Midurîya Karanê Diyanetî ya Cizîrî û Midurîya Ciwanan û Werzişî ya Cizîrî. Teberê nînan de dayê zaf sazîyanê bînan ê dewlete.”
Abdurrahman Durmuşî da zanayene ke çunke fermîyet de parkê sûke destê înan de nîyê, ê nêeşkenê xizmetê şarî bikerê û wina dewam kerd: “Semedo ke bi hawayêko fermî nê parkê Cizîrî destê nê sazîyan de yê, ma sey Şaredarîya Cizîrî nêeşkenê xizmet berê nê parkan. Seba ke şarê ma mexdûr nêmano, ma newe ra zî çîyo ke destê ma ra yeno, kenê. Labelê wexto ke ma xizmetê nê parkan kenê, dewlete vana ‘no xizmetê ke şima kerdo, bîyo zerarê şaredarîye’.”
Parkê sûke destê sazîyanê dewlete de yê la deynê elektrîkî şaredarîye rê yeno
Abdurrahman Durmuşî peynî de ard ziwan ke her aşme bi se hezaran lîra fatûrayê elektrîkê nê sazîyan şaredarîye rê yeno û qiseykerdişê xo wina qedîna: “Heto bîn ra, nê sazîyê ke parkê Cizîrî teslîmê înan bîyê, xizmetê nê parkan nêkenê; ne pakîye, ne ewlekarîye, ne awe dayene û ne zî roşnkerdişê şewe yê parkan. 17 aşmanê peyênan de ke ma ameyê serê karî, bi mîlyonan deynê elektrîkê nê parkan şaredarîye rê ameyo. Çiqa ke nê parkî destê şaredarîye de nîyê zî, fatûrayê elektrîkî ma rê birîyenê. Ma zaf reyan nê sazîyan rê nusenê ke wa aboneyîya elektrîkî bigêrê xo ser, la ê cewab nêdanê ma.”
