Şarê Wanî verba cezakerdişê Hemşaredarê Şaristanê Girdî yê Wanî Abdullah Zeydan reaksîyon nîşan da û dîyar kerd ke ê se heb qeyûman zî tayînê şaredarîyan bikê, ê do weçinitişan de reyna raya xo bidê DEM Partî.
Roniştişê 8. yê dewaya Hemşaredarê Şaristanê Girdî yê Wanî Abdullah Zeydan vizêr Mehkemeya Cezayê Giran ê 5. yê Amedî de ame kerdene. Mehkema 3 serr û 9 aşmî cezaya hepisî daye Abdullah Zeydan. Şarê Wanî qerarê mehkema ra pey vernîya Şaredarîya Şaristanê Girdî yê Wanî de kom bi û heta serê sibayî nobete girewte. Nobete bi slogananê “Zeydan û Şedal vîna me ne” û “Bijî berxwedana Wanî” reaksîyonê xo mojna.
Şarê Wanî Ajansa Welatî rê qisey kerd û hemverê qerarê mehkema û waştişê tayînkerdişê qeyûmî nêrazîbîyayîşê xo mojna.
‘Qerar siyasî yo’
Welatîyo bi nameyê Abdulbakî Dûran qerarê mehkema yê derheqê Abdullah Zeydanî de sey nehûqûqî bi name kerd û vat ke destsernayîşê îradeyê şarî yo. Abdulbakî Dûran dîyar kerd ke seba ke bieşkê talan û dizdîye bikerê dest da nêzdîyê 8-9 şaredarîyê DEM Partî ser o û vat: “No qerar qerarêko sîyasî yo. Talîmatî danê dozger û dadgeran kem dest bidê şaredarîyan ser o. Amanc zî talan û dizdîye ya. Xora 12 katirîlyon deyn verdabe. La şaredarî çend deyn est bo zî 10 aşman de xebatêka zaf baş kerd. Ma şaredarîyanê xo ra razî yê. No razîbîyayîşê ma zorê înan şono.”
‘Ma bibê yew û wayîrê îradeyê xo vejîyê’
Mevlut Alagoz da zanayene ke gelekî sîyasetmedarê înan nika zîndanî de yê û dîyar kerd ke ê zî do herinda înan ra şêrê. Mevlut Alagoz ard ziwan ke heta na game zî estbîyayîşê kurdan nêameyo qebulkerdene û nê çîyî vatî: “Her çiqas nika qebulnêkerdişêk zî est bo ez venga heme şarê Wanî dana ke wayîrê îradeyê xo vejîyê. Ma zaf reyan CHP’yî ra zî vat ‘bêrê ma het de vinderê û na neheqîye qebul mekê. Do dore bêra şima zî.’ Ewro dore ameya înan zî û înan nas nêkenê. Ez îrade û xoverdayîşê şarê kurd pîroz kena. Abdullah Zeydan îradeyê ma yo û ma qeyûman qebul nêkenê.”
‘Kurd kurdî verê nêyî’
Welatî Salîh Ergun zî cezaya ke Abdullah Zeydanî rê ameya birnayene şermezar kerd û vat ke netîce çi bena wa biba ma do hetê hemşaredaranê xo Neslîhan Şedal û Abdullah Zeydanî de bibê. Salîh Ergun dîyar kerd ke ganî zordarîya ke şarê kurdî ser o ya biqedîya û wina dewam kerd: “Şarê kurd wayîrê îrade û nirx o, wayîrê şeref û namûs o. Ma venga heme şarê xo danê ke wayîrê îradeyê xo vejîyê. Hetêk ra destê aştî ma rê derg kenê hetêk ra zî operasyonê înan ê sîyasî dewam kenê. Wazenê nê şarê bifetisnê. Do xoverdayîşê ma sey xoverdayîşê Awbendê Tişrînî bibo, sey yê Kobanê bibo. Ewro roj roja xîretî ya. Ma şar ê û ma do nê dizdan nê welatî ra pak bikerê.”
‘Ma peyê îradeyê xo de yê’
Dayîka Ayten Saygul zî ard ziwan ke dewlet dest dana îradeyê bi mîlyonan şarî ser o. O semedî ra behsê hûqûq û edeletî nêkera. Ayten Saygul dîyar kerd ke qrîzê mazbatayî de zî şarê Wanî xover da, do na rey zî xover bido. Ayten Saygul da zanayene ke ê qeyûman qebuş nêkenê û wina dewam kerd: “Qeyûm çîyêko bêrûmet o. Şaredarî dezgehêko fermî yo, cayêko leşkerî nîyo ke kesan tayîn bikerê. No dezgeh seba xizmetê şarî yo û şar zî îradeyê xo teslîmê hemşeradaranê nikayînan kerdo. No şar raya xo nêdaye şima, şima do zilmê xo heta key bidomnê. Ma heta peynî hemşaredaranê xo het de yê û peyê îradeya xo de yê.”
‘Ê ma ra se heban bigîrê ma do di sey heb tîya de bibê’
Welatîya bi nameyê Zeyneb Abî zî ard ziwan ke ê nêwazenê qeyûm tayînê şaredarîya Wanî bêro kerdene û wina dewam kerd: “Ma raya xo danê partîya xo û temsîlîyetanê xo gênê. La hema serra înan nêqedîyaya wazenê qeyûman tayîn bikerê. Wa şarê ma wirzo xo ser û vernîya şaredarîye de kom bibo. Hemşaredarê ma zaf baş ê, ma înan ra razî yê. Heta ke ma bibê ma wayîrê îradeyê xo vejîyê. Serkewtiş wa yê şarê kurd bo. Ê se heb qeyûman zî tayîn bikê ma do reyna weçînitişan de raya xo bidê partîya xo. Ê ma ra se heban bigîrê ma do di sey heb tîya de bibê.”
