Endama Desteyê Dîsîplînê Merkezî yê DEM Partî Zeynep Nîlgun Salmaner dîyar kerd ke ganî cinî prosesê aştî de rolêko aktîf kay bikerê û vat: “Ganî cinî her babeta prosesî de ca bigê.”
Endama Desteyê Dîsîplînê Merkezî yê Partîya Têduştî û Demokrasîyî ya Şaran (DEM Partî) Zeynep Nîlgun Salmaner ke derheqê meseleyê kurdî de proseso ke yeno rayraberdene ra bal ant û dîyar kerd ke ganî cinî her aste de beşdarê prosesî bibê. Zeynep Nîlgun Salmaner bale ant hewldayîşanê seba sey qonaxêkê prosesî parlamento de awankerdişê komîsyonêkî ser o û vat: “Amanc tena qiseykerdişê aştî nîyo, her babete de ke aştî bêra awankerdene ganî cinî beşdarê prosesî bibê.”
Salmaner da zaneyene ke prosesanê şer û pirodayîşî de hemverê cinî û gedeyan polîtîkayê şerî ê taybetî yenê kerdene û demanê şerî de cinî hîna zaf rastê tecawizî yenê û wina vat: “Demo ke merdim na cografya de seba kiştişanê cinîyan cigêrayîşan keno, rastê rêbazanê hovane yeno. Zafaneyê ê rêbazan demanê şerî de yenê ceribnayene.”
‘Problemê her kesî yo’
Zeynep Nîlgûn Salmaner da zanayene ke dewlete ver bi şer şona, feqîreya cinîyan vêşî kena û wina qisey kerd: “Seba proses dest bi nîqaşan kerd, gamî ke ameyê eştene est ê la seba ke çekî bêveng bibê nê gamî qêm nêkenê. Nê semedî ra lazim o cinî her qade de tesîranê şerî orte ra hewanê û awankerdişê aştî de bibê hemkar. No tena seba Têgêrayîşê Azadîye ya Kurdî nê seba her kesan ke na cografya de ciwîyenê, problem o.”
Zeynep Nîlgûn Salmaner dîyar kerd ke cinî mekanîzmayanê qerardarî de hîna zaf wayîrê rol bibê û wina vat: “Seba ma ya tewr muhîm, vilakerdişê sîstemê hemserekîye yo. Reyna bingeyê nê têkoşînî paradîgmaya demokratîk, ekolojîk, azadîwaştişê cinî yo. Demo ke ma awankerdişê azadîya cinî zereyê xo ra vejê yan zî bifikirî ke awankerdiş qels o, mumkin nîyo ke bi rastî zî komelêko demokratîk awan bibo.”
