Veysî Durmuşo ke 27 serrî yo xeylê şaristananê Kurdîstanî de karê hingdarîye keno, bal ant polîtîkaya dewlete ya îdxalatkerdişê hingimênê Îranî ser o û va ke rîyê hingimênê sexteyî ra, ê nêeşkenî karê xo bikerê.
Kurdîstan û Tirkîya de kesê ke bi keda destê xo wazenê debara xo bikerê, rîyê polîtîkayanê dewlete yê şaşan ra nêeşkenê karê xo ra qezenc bikerê.
Veysî Durmuşo ke 27 serrî yo xeylê şaristananê Kurdîstanî de karê hingdarî keno, ajansê ma rê behsê hing, hingimên û rewşa hingimênî ya herême kerd.
Durmuşî avzelîya wayîrvejyayîşê hingan ser o da zanayêne ke wa goreyê lazimîya hingan, kontrolkerdiş bibo û wina va: “Ma goreyê avzelîya hingan, kontrolê hingan kenê. Ma ewnîyenî ka mêr est o, çin o ya zî maye est a, çin a. Hewna ma ewnîyenî mîyanê hingan de nêweşî est a, çin a. Demo ke tu zerarî nêdî hingan, hingî hêrişê to nêkenê. Her sindoqêkî de mêrdêk est o, goreyê hingan û viraştişê hingî yê înan ma qatan erzenê petekan ser o. Demo ke hingî zêde benê, goreyê ci ma petekan zêde kenê. Demo ke hingê maye zêde benê, mîyanê xo de mêrdêkî veradanê û ê bîn zî kişenê.”
‘Ez polenan seba nêweşîye hewanena’
Durmuşî îfade kerd ke ê ray ray polenê hingan seba nêweşîye hewanenê û wina va: “Demo ke hinga maye ser o vilikî gêrenê, tozê vilikan gêno mîyanê çengê xo û seba wayîrvejyayîşê mêrdeyî ana mîyanê sindoqî. Na barêke, hingî ronena ser milê xo û anena, ez ray ray hewenena û seba xeylî nêweşîyan zî şuxulnena. Seba pîzedejî û averşîyayîşê esteyê domanan na hingî baş î.”
‘Ez hingdarêkê gêrayox a’
Durmuşî wina dewam kerd: “Ez 27 serrî yo ke karê hingdarîye kena. Ez hingdarêkê gêrayox a. Ez şaristananê Tirkîya, sey Mugla, Mersîn û Edene ra gêraya. Sewbîna şaristanê Kurdîstanî Amed, Cizîr, Silopî, Gever û Elkî ra gêraya û karê hingdarîye kena.”
‘Rîyê dewlete ra ma zerar kenê’
Durmuşî tewr peynî politikaya dewlete ya seba hingan û Sazîya Hingdaranê Şirnexî rexne kerd û wina qedîna: “Serrê peynî de mîyanê hingimênî de gilîkoz vejîyena. Rîyê hingimênî sexteyî ra nika hingimênê ma pere nêkeno. Seba ke dewlete zî destûr dana hingimênê Îranî, nê semedî ra ma zehmetî ancenê. Heme hingdarê herême, endamê Sazîya Hingdaranê Şirnexî yê. Ne hetkarîya ma kenê ne zî hingimênê ma herînenî. Demo ke hingimênê ma herînenî zî vayêka xeylî erjan ra gênê û no zî zerar dano ma.”
