Bi pêşengîya MEBYA-DER’î endamê HPG’yî Ahmet Furkan Kaya ame yadkerdene. Merasîmê yadkerdişî de mesajê girêdayîyîya cangorîyan ame dayene.
Bi pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) gerîlayê HPG’yî Ahmet Furkan Kaya (Ronî Çîya Alîdaş) ke 5ê teşrîna peyêne ya 2022î de Herêma Zapî de cuya xo vîndî kerdbî, bi girseyî ame yadkerdene. Seba Kayayî Keyeyê Tezîye yê Çewligijan ê Taxa 5ê Nîsane yê qezaya Rêzane ya Amedî de merasîmê yadkerdişî ame kerdene. Rayberê MEBYA-DER, DEM Partî, DBP’yî yê şaristan û qezayan, aktîvîstê TJA’yî, rayberê MED-DER, MED-TUHAD FED, TUAY-DER, Komela 78an, Dayîkê Aştî, endamê Meclîsê Ciwanan ê DEM Partî, Hemşaredarê qezayan, temsîlkar û endamê rêxistinanê sîvîlî beşdarê merasîmê yadkerdişî bîyê.
Girseyo ke ver bi keyeyê tezîye rayra şi, sloganê, “Şehîd namirin” vat. Dima ra girse vîyart zere. Dua û fatîhayî ameyê wendene. Seba vîrardişê cangorîyanê têkoşînê azadîye rêze ameye girewtene.
‘Ganî her kes paradîgamaya demokratîke fehm bikero’
Rayberê MEBYA-DER’î Mehmet Emîn Kiliçî merasîmê yadkerdişî de qisey kerd û vat: “Têkoşînê azadîye de Ronî Çîya Alîdaşî zî sey her embazêkê ma tewrê karwanê azadîye bi. Ma vanê serê keyeyî, şarê kurd û Rayber Apoyî weş bo. Têkoşînê PKK’yî zî maneno têkoşînê heme pêxemberan, senî ke îna waşto seba heme komelan aştîyêka domdare bikerê, yê PKK’yî zî eynî yo. Têgêrayîşê Azadîye zî wazeno mîyanê heme komelan de aştîyêka domdare awan bikero. Têkoşîno ke 50 serrî dewam kerdo, hema zî kes^eke vera nê têkoşînî şer kenê, têkoşînî fehm nêkerdo. Hêvî û rîcaya ma ya seba şarê ma ya, ganî her ke prensîbanê paradîgmaya demokratîke ya ke Rayber Apoyî daya awankerdene, fehm bikero.”
Merasîmê yadkerdişî bi zîyaretanê şarî dewam kerd.
