Rojhelatê Kurdîstanî de aşma temmuze de 6 girewteyê kurdan ameyî dardekerdiş, 46 kesî ameyî destbendkerdiş û 17 kesî bi sebebanê cîya-cîyayan cuya xo ra bîyî.
Merkezê Îstatîstîkî yê Rêxistina Heqanê Merdiman a Hana raporêk weşana ke tede binpaykerdişê heqan ê rejîmê Îranî yê aşma temmuze ca gênê.
Goreyê raporî aşma temmuze de tewr kêmî 46 hemwelatîyê kurdan bê tu qerarê edaletî hetê hêzanê Îranî ra ameyî destbendkerdene. Kesanê destbendkerdeyan mîyan de 6 cinî û 3 aktîvîstê xoza zî est ê. Goreyê daneyanê rêxistine serrneweyî ra nat hûmara kesanê destbendkerdeyan resaya 611î.
Raporî de ame dîyarkerdene ke hûmara pêroyîye 800î ra vîyarta, la destbendkerdişî bi temamî nêameyî rastkerdene.
Raporî de ame îfadekerdene ke aşma temmuze de 6 girewteyê kurdan ameyî dardekerdiş û bi naye hûmara kurdanê ke serrneweyî ra nat ameyî dardekerdiş, vejîya 52î.
Goreyê raporî aşma temmuze de 17 kesî bi hemleya rejîmî yan zî bi îhmalkerdişê ci cuya xo ra bîyî. Nînan ra 6 kolberî bi hemleya çekdarî ya hêzanê rejîmî cuya xo ra bîyî. Kesêk herêma Seqizî de bi teqayîşê mayînî û 3 karkerî zî bi sebebê nêbesîya tedbîranê asayîşê karî, wexto ke xebitîyêne cuya xo ra bîyî.
Raporî de ame dîyarkerdene ke aşma temmuze de 4 waqayê xokiştişî, 2 cinî û 2 camêrdî û 4 qirkerdişê cinîyan ke hetê endamanê keyeyî ra ameyî kerdene, qeyd bîyî.
Goreyê raporê Rêxistina Heqanê Merdiman a Hana, aşma temmuze de Rojhelatê Kurdîstanî de binpaykerdişê heqanê merdiman heme waran ra dewam kerd.
