Çarçewaya zext û hêrişanê dezgehanê asayîşî yê rejîmê Îranî yê ke serê şaristananê cîyayan ê Rojhêlatê Kurdîstanî de pêlêko newe yê destbendkerdene, şîdet û eştîşê serê keyeyan ameye destpêkerdene.
Yeno vatene ke 14 kesî ameyî destbendkerdene. Rêxistina Heqanê Merdiman a Kurdîstanî, zêdebîyayîşê kerdişanê bêvengkerdişî yê rejîmê Îranî yê vera hemwelatîyanê Rojhêlatê Kurdîstanî ser o yew rapor weşana. Goreyê raporî, sûka Urmîye de hûmara kesanê ke roja çarşemeyî ameyê destbendkerdene resa 5 kesan û nameyê înan wina yê: “Mecîd Îbtîhaj, Wahîd Şe’banî, Bêhdar Esedî, Saleh Derbûbeçîçek û Ferheng Dêhqan.”
Heto bîn ra şaristanê Şino û Mehabadî de zî 7 hemwelatî hetê hêzanê asayîşî ra ameyî destbendkerdene û berdî cayêko nêzanayeyî. Qezaya Şinoyî de 6 hemwelatîyê bi nameyê Ehmed Hacîpûr, Ebdulbasit Bapîrî, Soran Bayîzîdî, Rehîm Erşedî, Reza Reşîdnîya û Fexredîn Îbrahîmî (lajê girewteyê sîyasî yê ameyo îdamkerdene Mihedîn Îbrahîmî) ameyî destbendkerdene.
Şaristanê Mehabadî de zî aktîvîst Hîwa Ebdulahî ame destbinkerdene. Qezaya Kamyaranî de zî roja panşemeyî, hêzanê Îstîxbaratî (Îtîlaat) bi wesayîtanê sîvîlan eşt dikananê di esnafan ser nameyê înan Muhsîn Esedî (35 serre û pîyê di domanan) û Yasir Husênî yê. Ê her di bi îşkence ameyî destbendkerdene û yeno vatene ke destbendkerdişê înan semedê grevê pêroyî yê serrgêra qirkerdişê Jîna Emînî ra eleqedar o.
Qezaya Pîranşarî de zî kakimêko bi nameyê Mam Ezîz Qadirî (şarê Paswê ra) hetê Îtîlaata Supayê Pasdaran ra ame vengdayene û ci rê pers û cewab ame kerdene; eynî wext de hêzanê asayîşî eşt keyeyê ey ser û xesar da eşyayanê keyeyî. Nê hêriş û destbendkerdişan reyde, qezaya Bane de kolberê 20 serre yê şarê Seqizî yo bi nameyê Arwîn Ezîzî, serê sînorê Hengejal ê Baneyî de bi guleyanê rasterast ê hêzanê çekdaran ê rejîmê Îranî pîzeyê xo ra bi giranî dirbetin bî û wedarna nêweşxane.
Tewlê xebat û teqîbkerdişê keyeyan zî, heta nika merkezanê asayîş û edaletî tû cewab nêda înan.
