Parlementerê Mêrsînî Alî Bozanî dîyar kerd ke tabloya xoverdayîşê Rojawanî yewîya neteweyî ya kurdan de merhelêka muhîme viraşta û vat: “Vera tehdîtê qirkerdişî xeta hişmendî û têkoşînê hemparî ameya ronayene.”
Bozanî vat: “Bi cinî, doman û pîlan herkes kuçeyan ra yo. Kuçeyan ra bi posterê Rayberê Şarê Kurdî Abdullah Ocalanî, bi resmanê Mesûd Barzanî, Mam Celal û Bafil Talebanî, bi renganê neteweyî yê kurdan, bi beyreqanê YPG û YPJ’yî îradeyê piştîpêdayîş û xoverdayîşî yo gird aseno. Na tablo mojnena ke şarê kurdî vera hêrişanê Rojawanî bi hişmendîya neteweyî û vindertişê hemparî hareket keno.”
Semelka de atmosferê ‘Bijî Berxwedana Rojava’
Bozanî dîyar kerd ke Berê Sînorî yê Sêmalkayî de zî înan atmosferêko winasî dî û vat ke ciwanê Başûrî bi sloganê “Bijî Berxwedana Rojava” amade bîyî ke bivîrê Rojawanî. “Pêro ciwanê Başûrî bî. Na rewşe mojnayîşo tewr şênber ê yewîya neteweyî û wayîrvejîyayîşê xoverdayîşê Rojawanî yo.”
‘Ruhê Xoverdayîşê Kobanê gandar o’
Bozanî vat ke Rojawan çar hetan ra hetê çeteyan ra ameyo dorpêçkerdene, labelê ruhê Xoverdayîşê Kobanê yê 2014î ewro zî bi hewayê pawitişê cuye, viraştiş û destkewteyan rêxistin bîyo.
‘Nê hêrişî tesadufî nîyê’
Bozanî vat: “Nê hêrişî tesadufî nîyê. Hêrişê ke ewro vera Rojawanî yenê kerdene beşêkê polîtîkaya zafhetî yê ke wazeno destkewteyanê şarê kurdî tasfîye bikero. Bêvengîya mîyanneteweyî û piştîya Tirkîya cesaret dana nê hêrişan. Labelê tabloya ke Rojawan de vejîyaya bi îradeyê şarî yo pêt vera nê polîtîkayan vindeno.”
