Serekkomarê Tirkîya 11ê teşrîna peyêne sey “Roja Ronayîşê Daran a Mîllî” îlan kerdbî. Rixmo ke xeylê sazgeh û dezgehê fermî yê dewlete vanê “ma seba pawitişê xoza daran ronenê” zî heto bînî ra daristanî bi fermanê rayedaranê dewlete yenê talankerdene.
Şirnex û Sêrt de bi serran o daristanî yenê birnayene û xozaya her di şaristanan yena talankerdene. Herême de tewr zaf darî yenê birnayene. Seba ke vera talankerdişê xoza reaksîyonêko bi hêz çin o, vernîya nê talanî nêeşkena bêra girewtene. Her roje herêma Besta, Koyê Cûdî û Gabarî de darê ke yenê birnayene, bi erebeyan benê şaristananê bînan.
Demo ke reaksîyon yeno dayene, rayedarê dewlete yê sey walî, mudirîyetê daristan û kulturî û parlamenterê AKP’yî eşkerayî danê û vanê “ma do êdî destûre nêdê ke daristanî bêrê birnayene” la no vatiş tenê seba ke vernîya reaksîyonan bêra girewtenei, yeno kerdene.
Dewlete bi destê xo îhaleyana birnayîşê daran kena û nê îhaleyan rasterast danê cerdevan û kesanê ke binê kontrolê înan de yê. Roja ke tewr kêm 200 û 300 ton darî nêrê birnayene çin a.
Bi çadirkerdişê erebeyan wazenê talanî binimnê
Ewile birnayîşê daristanan bi hewayêko eşkera ameyêne kerdene la dimayê reaksîyonanê sazgehanê ekolojî û şarî vêş bîyê, êdî talanan nimitikî kenê. Êdî darê ke yenê birnayene şewe mîyanê daristanî ra anê û bar kenê erebeyan û serê îna çadiran reyde padenê. Her çend biwazê nê çîyî bi nimitkî bikerê zî heqîqet senî biba zî vejîyena orte.
Cûdî, Gabar û Besta de birnenê û seba kalekolan benê
Demanê peyênan de heme êzimê ke Herêma Besta, Koyê Cûdî û Koyê Gabarî de yenê birnayene, rasterast seba kalekol û qereqolanê şaristananê Sêrt, Şirnex û Colemêrgî yenê erşawitene. Sewbîna seba kalekolê ke sînorê başûrê Kurdîstan û kalekolê ke mîyanê sînorê başûrê Kurdîstanî de yê, yenê erşawitene. No amadekarîya nê kalekol û qereqolan ê zimistanî yo.
‘Roja ronayîşê daran’ de daran birnenê!
Serekkomarîya Tirkîya serra 2019î de 11ê teşrîna peyêne sey “Roja Ronayîşê Daran a Mîllî” îlan kerdbî. Xeylê sazgehê dewleta tirke vizêr nê şaristanan de bêyî ke talanê xoza bivînê, seba pawitişê xoxa şitilê daran ronayê. La roja ronayîşê daran a nê sazgehê dewlete zî bi seyan darî Cûdî, Gabar û Besta de ameyê birnayene.
Çimanê Walîyê Şirnexî ver de naklîyeya êzimanê talanî
Vatişê “roja ronayîşê daran de darî ameyê birnayene” şîroveyêk nîyo. Demo ke Walîyê Şirnexî Koyê Cûdî de reklamê ronayîşê şitilê daran kerdêne, bi desan ton darî ameybî birnayene, bi TIRan vernîya Walîyê Şirnexî ra vîyartê. Nê TIRî ke darî tede ameyê barkerdene û hewl dabi ke înan bi çadiran binimnê, daran seba kalekolanê sînor berdêne.
