Festîvala Kultur û Hunerî ya Şaredarîya Tetwanî ke bi sloganê “Tetwan de kultur est o, huner est o, ma est ê” ameya organîzekerdiş, roja xo ya 5. de bi Dîwanê Dengbêjan û konseran dewam kerd.
Roja 5. ya Festîvala Kultur û Hunerî ya Şaredarîya Tetwanî ya 58. ke bi sloganê ‘’Tetwan de kultur est o, huner est o, ma est ê’’ ameya organîzekerdiş, ewro Taxa Aydinlarî de parka “Baxçeyê Mîletî” de bi programê “Dîwanê Dengbêjan” ya Xalîde, Evîn Sîndî û Mihemedê Serhedî bi coşêko pîl dewam kerd.
Hemşaredarê Tetwanî Belkiza Beştaş Epozdemîr û xeylê welatîyî beşdarê programî bîyî. Dengbêj Xalide, Evîn Sîndî û Mihemedê Serhedî bi vengê xo yê xozayî kilamê herêma Serhedî, Botanî û Êzidxanî seba beşdaran vatî. Dimayê kilaman plaketî seba dengbêjan ameyê dayîş û programê Dîwanê Dengbêjan qedîya.
Vîrardişê Aram Tîgranî
Şewa 5. ya festîvala Koma Agirê Zerdeşt, Koma Rengîn û Hunermend Cevdet Bagca sehne girewt. Qadê festîvale bi hezaran merdimî ameyê têhet û şarî kilamanê hunermendan reyde keyfê festîvale heta saetanê erey ê şewe ciwîya. Hunermend Cevdet Bagca hunermendê bêmerg Aram Tîgranî yad kerd û deyîra “Ay Dîlberê” seba beşdaran vat. Roja 5. ya festîvale bi konserê Hunermend Cevdet Bagca qedîya.
Programê sibayî
Roja 6. ya festîvale do bi beşdarîya xeylê weşanxaneyan fuarê kitaban, panelê bi babeta “Madeyanê Hişberî”, konserê hunermend Eylul Nazlier, Murad Demîr û koma Sîya Şevê dewam bikero.
