Rêxistinanê heq û huqûqî û 10 baroyan, agahdarîya hempare de ke Komîteya Wezîran a Konseya Ewropa rê kerd, waşt ke seba tatbîqkerdişê qeraranê AÎHM’î yê derheqê Rayberê Şarê Kurdî Abdullah Ocalanî û girewteyanê bînan prosesê kontrolî bêro tesîrdarkerdene.
Dezgehê ke rêxistinê heqan û baroyî tede yê, verê kombîyayîşê Komîteya Wezîran a Konseya Ewropa yê 9-11ê hezîrane, komîte rê agahdarîyêka hempare pêşkêş kerde. Muracat, çarçewaya prosesê kontrolî yê qerarê “Ocalan (2)” û qeraranê binpaykerdişî yê dewayanê “Kaytan”, “Gurban” û “Boltan” de ame kerdene.
Agahdarîye de ame îfadekerdene ke Tirkîya, çend ke qebul kena tay mehkumê hepsê muebbedê girankerde nêeşkenê biresê heqê veradayîşê bi şertî, hema herinda reformê şênberî sîstemê nikayî pawena. Ame qeydkerdene ke heta ewro derheqê tu verkarê qanûnî yan mekanîzmaya nîyadayîşî de gamêka şênbere nêmojnaya.
Rêxistinan veng da Komîteya Wezîran ke prosesê kontrolî hîna tesîrdar bişuxulno; Tirkîya ra datayê îstatîstîkî yê hîraye bêro waştiş û qedexeyê kategorîkî yê veradayîşê bi şertî bêrê hewanayene. Hem zî waşt ke babeta “heqê hêvî” hetê Komîsyonê Venedîkî ra bêro etudkerdene.
Agahdarîya hempare, hetê Komela Huqûqnasan seba Azadîye, Komela Huqûqnasanê Cagdaş, Weqfa Cigêrayîşanê Komel û Huqûqî, Komela Heqanê Merdiman, Komela Komelê Sîvîl mîyanê Sîstemê Înfazê Cezayî û baroyanê Êlih, Amed, Colemêrg, Mardîn, Mûş, Îdir, Sêrt, Riha, Şirnex û Wanî ra ame îmzakerdene.
