Temsîlkaranê rêxistinan elewî keyeyê 34 kesan ke 28ê kanûna 2011î de dewa Roboskî ya qezaya Qileban a Şirnexî de encamê hêrişê hewayî de cuya xo vîndî kerdbî, zîyaret kerd.
Zîyaretê vîrardişê Qirkerdişê Roboskî bi beşdarîya temsîlkaranê komelanê elewî û kulturî, partîyanê sîyasî û rêxistinanê girseyî yê denmokratîk ame kerdene. Heyet hetê keyeyanê ke merdimê xo vîndî kerdî ra ame pêşwazîkerdene.
Serekê Pêroyî yê Federasyonê Bektaşî yê Elewîyan (ABF) Mustafa Aslanî dîyar kerd ke qirkerdişê Roboskî qirkerdişê ke dewlete reyde rî bi rî nêameya ra yew o û vat: “Qirkerdişê Roboskî de 34 kesan cuya xo vîndî kerde. Tena waştişê înan debarê cuye bi. Seba parekerdişê nê dejî ewro ma tîya de yê.”
Serekê Pêroyî yê Konfederasyonê Yewîya Elewîyan ê Ewropayî (AABK) Huseyîn Matî zî vat: “Hem elewî û hem zî kurdî nê welatî de xeylê dejî dîyê. Tena waştişê înan hemwelatîbîyayîşo têduşt o. La dewlete bawerî û nasnameyê înan nas nêkerd û eksê ci seba ke her kesî bikero sey xo qirkerdiş kerd. Qirkerdişê elewî û Roboskî seba ma seypê yê. Dejê ma yew o.”
Velî Encuyî zî nameyê keyeyanê kesanê ke qirkedişî de cuya xo vîndî kerda qisey kerd û vat ke ê do têkoşînê xo yê 14 serran ê seba edaletî bidomnê.
Zîyaret bi zîyaretkerdena kesanê ke cuya xo vîndî kerda, qedîya.
