Rojnameger Rêşad Sorgulî dimayê 7 xebatan, na rey açarnayîşê “Manîfestoyê Komelê Demokratîkî” yê Rayberê Şarê Kurdî Abdullah Ocalanî qedêna û na berheme bi hawayêko biveng pêşkêşê goşdarîkeran kerd. Rêşad Sorgulî dîyar kerd ke manîfesto do dimayê xebatanê redaksîyonî sey kitab bêro çapkerdiş.
Rojnameger û nuştox Rêşad Sorgulî “Manîfestoyê Komelê Demokratîkî” yê Rayberê Şarê Kurdî Abdullah Ocalanî ziwanê Tirkî ra açarna lehçeya kurmancî ya Kurdkî û hesabê xo yê YouTubeî ser o bi hawayêko biveng pêşkêşê goşdarîkeran kerd. Açarnayîşê na berheme ke munaqeşayî modernîteya kapîtalîst, rexneyê sîstemê netewe-dewlete, caardişê aştî û awankerdişê komelê demokratîkî tede ca gênê, êdî qada dîjîtale de zî vernîya destan de ya.
Rêşad Sorgulî manîfestoyî sey 4 beşan kanalê xo yê YouTubeî de vila kerdo û o bi xo waneno. Nê her çar beşî pêro pîya 6 saetan genê û Rêşad Sorgulî bi ziwanêko zelal veng dayo ci.
Rêşad Sorgulî prosesê açarnayîşî û derheqê muhîmîya xebata xo de ajansê ma rê qisey kerd.
Muhîmîya açarnayîşî
Rêşad Sorgulî dîyar kerd ke berheme hetê grûba xebate ya Têgerayîşê Azadîye yê Kurdî ra nuşteyanê Rayberê Şarê Kurdî Abdullah Ocalanî ra ameya amadekerdiş û da zanayene ke verî zî 7 berhemê Rayberê Şarê Kurdî açarnayê û bi saya tecrubeyanê verênan, warê termanê teorîk û felsefîkî de na rey zaf zehmetî nêdîya. Rêşad Sorgulî derheqê açarnayîşî de nê çîyî vatî: “Çi heyf ke çîyo ke mi kerdo açarnayîş o, la rastîya ey mi waştêne ke sey açarnayîşî nê sey adaptasyonî bikerdêne. Çunke mi nê açarnayîşî de reyna fehm kerd ke ganî vatişê îdeolojîkî ti bi ziwanê xo vajê, yanî ti biçarnê zî ganî raşteraşt nêbo açarnayîş, vatiş ca de bibo, ganî merdim fistanê ey goreyê rastîya xo û ziwanê xo bifesilno û biderzo.”
Muhîmîya xebatanê dîjîtalan
Sewbîna Rêşad Sorgulî dîyar kerd ke çarçewaya ziwanê Kurdkî de averberdişê tedeyîyanê dîjîtalan û xurtbîyayîşê zîrekîya viraşte (AI) raşteraşt bi cehdanê şarê kurdî mumkin o û wina vat: “Xebatê kulturî, edebî û ziwanî ruh û can danê estbîyayîşê ma. O semed ra ganî her kurd kêm zêde xebatêk torra dîjîtale ser o bikero. Warê Kurdkî de zîrekîya viraşte zeîf a, çunke ma zeîf ê, xebatê ma zî zeîf ê. Ma çend xo bihêz bikerê, zîrekîya viraşte (AI) zî do hende bihêz biba.”
Do sey kitab bêro çapkerdiş
Rojnameger Rêşad Sorgulî da zanayene ke nika destê ey de tekstê dokumanterê “Vejîna Kurd” î zî est ê û seba açarnayîşê înan xebitîyeno.
Rêşad Sorgulî ard vîr ke na berheme dimayê xebata redaksîyonî ya ke hetê rojnameger Luqman Guldîvî ra yena rayraberdene, hetê Koma Xebate ya Têgerayîşê Azadîye ra sey kitab zî do bêro çapkerdiş.
