Rejîmê Îranî seba ke binpaykerdiş û tedayê vera hepisxaneyan nêrê eşawitene, 9ê çeleyî ra nat heme xetê telefonî yê hepisxaneyan birnayê.
Keyepelê Vengê Girewteyanê Kurd û Îranî derheqê rewşa hepisxaneyan de agahîyê neweyî pare kerdê.
Goreyê agahîyanê ke ameyê parekerdene, roja 9ê çeleyî ra nat heme xetê telefonan ê hepisxaneyan ameyê birnayene ke girewteyî nêeşkê keyeyanê xo reyde qisey bikerê û agahîyanê derheqê hepisxaneyan de teberî reyde pare bikerê.
Xebere de ame vatene ke seba ke hepisxaneyan ra agahî nêyena girewtene, endîşeyê rewşa girewteyan ser o bi taybetî girewteyanê sîyasî ser o vêşî bîyê.
Eynê wextî de ame dîyarkerdene ke merdimê girewteyan vengdanê rêxistinanê heqanê merdiman ê zereyî û mîyanneteweyî ke vera na rewşe tedaya rejîmê Îranî bikerê ke binpaykerdişê heqan vindarno.
28ê kanûna 2025î ra nat pêroyê Îran û Rojhelatê Kurdîstanî de vera krîzê aborî, problemê sîyasî û komelkî çalakî dest pêkerdê. Rixmo ke rejîmê Îranî bi şeklêko hişk nêzdîyê çalakîkeran beno zî her ke şono çalakî hîrayêr benê.
Hêriş û tedayê hêzanê rejîmê Îranî yê çalakîkeran ser o zafêrê 10 hezar çalakîkerî ameyê destbendkerdene û zafêrê 491 çalakîkerî ameyê qetilkerdene.
