Tora Heqanê Merdiman a Kurdîstanî dîyar kerd ke rejîmê Îranî 3 melayê kurdî destbend kerdê.
Tora Heqanê Merdiman a Kurdîstanî dîyar kerd ke rejîmê Îranî melayêko kurd destbend kerd û cezaya hepsî daye melayêko bîn. Ame dîyarkerdene ke melayo kurd ê bi nameyê Ayet Xulamî şaristanê Kirmanşan ê Rojhelatê Kurdîstanî dima ke seba pawitişê karûbaranê mamosteyanê dînî ameyo silaynayene, ame destbendkerdene û ver bi cayo ke dîyar nîyo ame berdene. Ame dîyarkerdene ke Mela Ayet Xulamî bi manayê “îmzakerdişê nuşteyo ke derheqê şermezarkerdişê cezaya dardekerdişî û qetilkerdişê qaçaxçîyan” ameyo destbendkerdene.
Tora Heqanê Merdiman a Kurdîstanî dîyar kerd ke melayê kurd ê bi nameyê Sabir Xudamuradî zî vizêr nimajî ra ver vernîya camîyêko şaristanê Seqizî de hetê Mehkemaya Taybete ya Mamosteyanê Dînî ya Hemedanî ra bi cezaya hepisxaneyî ameyo mehkumkerdene. Goreyê agahîyan rejîmê Îranî bi îdiaya “Vera hukmatê propaganda, herimnayîşê raya pêroyî û seba Serewedaritişê Jin, Jîyan, Azadî paştî dayîş” 22 aşmî cezaya hepsî mela Xudamuradî rê ameye dayene.
Pêlê zilmî dest pêkerdo
Erjeno merdim vajo ke demanê peyênan de rejîmê Îranî vera melayanê kurdan ê Rojhelatê Kurdîstanî û Îranî pêlê tehdît û zilman dayo dest pêkerdene. Na çarçewa de melayo kurd Luqman Emînî zî 21ê nîsane de şaristanê Sinê de dima ke hetê Mehkemaya Taybete ya Seba Mamosteyanê Dînî ya Hemedanî ra ameyo silaynayene, ameyo destbendkerdene û ey berdo cayo ke dîyar nîyo.
