Pîr û taliban, der û cîranan, kam ke jîyar û dîyaranê xo ra wayîr vejînê Jîyara Hewşa Merge de pêro pîya amey pêser. Tay kesê înan dûgêlanê bînan ra, tayê înan Qisle ra, Pilemurîye ra, tayê zî zereyê Dêrsimî ra ameyê têlewe. Îtîqat û rindîye ser çîlayî veşnayî û loqme kerd vila, gulbangî dayî.
Qomê Dêrsimî, vizêrî serê jîyara Hewşa Merge ya ke girêdayeyê Pilemûrîye ya de ameyî têlewe. Pîr û taliban pêrûne pîya serê jîyare de çîlayî veşnayî û loqmeyî kerdî vila û gulbangî dayî. Pîr Dewrêş Îsmaîlî gulbangî dayî û temur cinit û venga Heqî da. Hunermend Şenol Akdagî beyîtî vatî, Etnomuzîkolog Daîmî Cengîzî, şîîrê şaîranê Dêrsimî wendî. Şarê Dêrsimî pîya vengê heqî da û vat: “Her jûyê ma gino kotîro, welatê xo ra dûrî mendîme, nê jîyar û dîyaran ma ardî jû ca.”
‘Jîyaranê xo de dûr mêvindîme’
Pîr û talîban jîyara Hewşa Merge de Raya Heqî ser jîyar û dîyaran ser qisey kerd. Seba ke na raye û no qomê Dêrsimî weşîya xo biramo û aver bero ganê têlewe amayene, jûbîyayene bibo ser ame vindetena. Ame vatene ke waxt wawtê aştî û rindîye yo, ganî ma pîya raye ra şime.
