Şaredarîya Wanî ya Şaristanê Girdî ke qeyûm tayînê ci bî, xeylê gedeyî bi manayê “heqê xo nêdayo” kreşa Perperoke ra eştê.
Walîyê Wanî Ozan Balci 15ê sibate de sey tayînê Şaredarîya Wanî ya Şaristanê Girdî bi ke rayberîya DEM Partî de ya. Qeyûm projeyê ke demê rayberîya DEM Partî de ameyê dest pêkerdene, yew bi yew dano vindarnayene yan zî betal keno. Eynî wextî de projeya 2 tesîsanê seba îstîhdamê cinîyan ameybî amadekerdene zî dayê vindarnayene. Tewrê nînan xeylê xebatê ke qadanê rayîr, awe, kanalîzasyon, îmar, cinî, ciwan û kulturî de zî dayê vindarnayene.
Rayberîya qeyûmî kreşê Perperokî ra dest bi vetişê gedeyan zî kerd ke bi ziwanê dayîke xizmet dayêne gedeyan. Kesê ke tayînkerdişê qeyûmî ra pey sey berpirsîyar kreşî de ameyê wezîfedarkerdene, xeylê gedeyî bi maneyê “heqê xo nêdayo” kreşî ra vetê.
Kreş demê rayberîya DEM Partî de ame akerdene û kreşî de keyeyanê bê îmkanan ke nêeşkenê heqê gedeyan bidê, pere nêameyêne girewtene. Keyeyanê bînan zî pereyêko kêm dayêne.
‘Gedeyî çira kreşî ra yenê eştene?’
Reyhan Bahadir ke kênaya aye kreşî ra ameya eştene dîyar kerd ke kênaya aye 10 aşmî şîya kreş û aye ra qet pereyî nêameyê girewtene. Reyhan Bahadir wina vat: “Tayînkerdişê qeyûmî ra pey xeylê gedeyî kreşî ra ameyê eştene. Demo ke şaredarî rayberîya DEM Partî de bîye, qet problem çin bi û gedeyî bi rehetî kreşî de ameyêne perwerdekerdene.”
Reyhan Bahadir da zanayene ke kesê sey mudir kreşî rê ameyê tayînkerdene, aye tehdît kerdo û nê çîyê vatî: “Ez şîya hetê keso ke sey mudir ameyo tayînkerdene, Ez ey ra persaya çira gedeyê ma kreşî ra eştê. Mi ra vat ke to heta nika qet pereyî nêdayê. Demo ke ez vera ey vejîyaya zî mi pê destbendkerdişî tehdît kerd.”
Reyhan Bahadir vat ke seba ke gedeyê înan kreşî ra ameyê vetene, ê mexdûr bîyê û wina dewam kerd: “Demo ke gedeyê ma şîyêne kreş ma şênayêne karê xo bikerê. Ez karê pakîye kena û cayo ke ez kênaya xo rona, çin o. Sey keyeyêko mexdûr ma na rewşe ra eciz ê. Ma qeyûm nêwazenê û şaredarîya ke qeyûm rayra beno nêwazenê.”
