Şarê Taxa Baglarî ya merkezê Colemêrgî reaksîyon da îdareyê qeyûmî û dîyar kerd ke bi hewteyan o awe bi serûber nêyena dayene û kes çin o ke problemanê înan çareser bikero.
Merkezê Colemêrgî de problemê awe bîyo krîzêko pêroyî û gird û cuya rojane ya welatîyan serûbin keno. Rîyê bêberpirsîyarîya îdareyê qeyûmî û xebatanê giranan ê vurnayîşê şebekeyanê awe ra zaf taxî bi hewteyan o bêawe mendî; welatî mecbur ê ke awe bi dore bigîrê.
Welatîya taxe Amîna Ozdemîre vat ke tayê rojan awe qet nêyena, tayê rojan zî tena 1-2 saetî yena dayene: “Ma nêeşkenê ne werd bipewjê ne zî pakîya xo ya rojane bikerê. Di-hîrê hewteyî yo no hal dewam keno. Ne muxtarêk ne zî kesêk est o ke rewşa ma ser o vindero.” Bahar Turane zî vat: “Ma nêeşkenê makîneya cilşutişî bişuxulnê û nivînanê xo bişuwê. Ma xeber danê şaredarî la awe nêakenê. Ma tayê reyan di saetan ra vêşêr rayîrî ser o paweyê wesayîtê şaredarî manenê.”
Selîm Dayan ke 45 serrî yo taxe de ciwîyeno, ard ziwan ke problemê awe û rayîran bi serran o dewam keno: “Emser ma qasê 30 waştişnameyî şaredarî rê ray kerdî, rayîr viraşt la teng o û binawanî çin a, coka awe yena rayîrî ser o. Her di rojan rey tena saetêk awe danê ma, a zî lêmin a û kermî tede yê, nêyena şimitene. Walî zî ameybî taxe, vatbî ma do problemê şima çareser bikerê, la nêkerd.”
Sureyya Tûrane vat: “Vistewrîya mi nêweş a û mîyanê nivînan de ya. Ganî ez sereyê aye bişuwa, la yew çilka awe keye de çin a. Tewr peynî di rojan ra ver awe ameybî, nika zî çin a.”
Mikaîl Taşî îfade kerd ke vilakerdişê awe de cîyakerdiş yeno kerdene: “Taxanê bînan rê awe danê, la ma rê tena saetêk. Bi awa saetêkî ez cilan bişuwa, keye pak bikera yan depoyê awe pirr bikera?” Ahmed Alkanî zî vat ke badê xeta newîye zaf cayan de xortimê awe teqayî la kes nêame: “Xeta verêne de her di rojan rey awe ameyêne, la na newîye de qet nêyena. Ma şinê çimeyan ra awe anê. Kes goş nêdano ma.”
