DEM Partî, CHP û Partîya Yenî Yolî verba tayînkerdişê qeyûman çeleng ronayê verê Wezaretê Karanê Zereyî. Serekwekîla Koma DEM Partîye Gulistan Kiliç Koçyîgît va: “Qeyûm nê tena tayînî Sêrtî, tayînî pêroyîya welatî kerdê.”
Serekwekîlê Koma Partîya Seyyewbînan û Demokrasî ya Şaran (DEM Partî) Gulistan Kiliç Koçyîgît, Serekwekîlê Koma CHP’î Murat Emîr û Serekê Koma Partîya Yenî Yolî Bulent Kaya zî mîyan de, zaf wekîl verê Wezaretê Karanê Zereyî de heqê tayînkerdişê qeyûman beyanat dayê.
Gulistan Kiliç Koçyîgît dîyar kerd ke serra 2016î ra hetanî nika qeyûm ser şaredarîyan yenê tayînkerdene û wina va: “Ti bingeyêka înan a qanûnî çin a. Destûra Bîngeyîn binpê kenê. KHK a demê OHAL’î de vejîyayê sey îdia nîşan danê. Ê no welat de derbe kerdê zî wina kerdê. No qanûn, rewa nîyo, huquqî nîyo, exlaqî û wijdanî nîyo. Heqê hemwelatijî yê her dormera yê komelî yenê binpêkerdene. Heqê weçîniteyan û weçînitoxê yeno binpêkerdene. Hewldayişêko seba wedartişê hemwelatijî yo. Eke siba xo ra bivînê do meclîs û weçînayişî zî bihewanê. No ser ganî ma pîya verba ci bivejê û têkoşîn bidê.”
Ma do serî nêtewînê
Murat Emîr zî wina va: “Rayê şarî ameyê xespkerdene. Ma do serî nêtewînê. Pêroyîya şarê welatî yenê eştiş, biqasî pîya biercînê. Makezagon de guya her kes seyyewbînan ê la demê Pulur, Esenyurt, Sêrt û Mêrdînî de yeno weçînayiş; vanê ‘şima nêeşkenê biweçînê.’ Ma sey partîyê sîyasî heqê xo pawiyenê.”
Bulent Kaya zî aşkera kerd ke derheqê Hemşaredarê Sêrtî Sofya Alagaş de qerarê mahkeme ya qatî çîn o û wina va: “Doza ci domyena zî hemşaredarî kerd. Sêrt de ti rewşê xirabe rî nêdanê. Qerarê mahkemeya herême nê qeraro qatî yo. Hetanî qerao qatî nêbo zî her kes verê qanûnan bêgune yo. Şima bi aşkera vanê ke demokrasîya Beşîktaş û Esenyurtî cîya ya.”
Şar vano êdî bes o!
Wekîla EMEP’î Sevda Karaca zî ard ziwan ke şar vano “êdî bes o.” û vengdayişê têkoşîno hembar da.
Çelengo sîya ronayê verê wezaretî
Peynîya beyanatî, wekîlan waştê çeleng ronê verê wezaretî. Polîsan hewl dayê asteng bikê. Wekîlan verê astengkerdişan zî çeleng ronayê. Wekîl û welatijan pîya silogan qirayê.
