Qamişlo, Tirbespi û Amûde de bi des hezaran kesî bi sloganê “Rayber Apoyî rê azadî û Newroza yewîya demokratîk ê kurdî” Newroze pîroz kenê.
Şarê Qamişlo û dewanê aye bi heyacan verê xo da warê Newroze yê Stadyumê Şehîdanê 12ê Adare. Bi des hezaran kesî meydan de ameyê pêser verê def û zirneyan de demêko derg govende çarna. Girseyê sloganê, “Bijî SerokApo”, “Bijî Newroz” û “Bijî Kurdîstan” berz kerdî, bi tilîlî û çepikan govende çarna. Pîrozkerdiş bi rêzgirewtena seba cangorîyanê azadî û demokrasî dest pêkerd, do bi qisey kerdişê Endamê Komîteya Rayberê yê Partîya Yewîya Demokratîk (PYD) Aldar Xelîl û bi nameyê meclîsê Keyeyanê Şehîdan Şemsîxan Gulo dewam bikero.
Sewbîna zî Koma Şehîd Hîva, hunermend Daniş Botan, Koma Botan, hunermend Newroz Efrîn, Koma Şehîd Welat, hunermend Sefqan Orkêş, Koma Şehîd Sakîne Cansiz û hunermend Raman Darî do sehne bigîrê.
Tirbêspi
Şarê şaristanê Tirbêspî û dewanê herêmanê Cereh, Alîyan û Sinceq zî dewa Derîcîk ê Tirbêspî de kom bîyê. Girseye sloganê, “Bê Serok Jiyan nabe”, “Bijî Newroz”, “Bijî berxwedana YPG û YPJ’î verê def û zirneyan de govende çarna. Pîrozkerdiş bi rêzgirewtişê seba cangorîyan dest pêkerd. Meydanê Newroze bi fotografanê cangorîyan, beyreqê YPG û YPJ’î û Meclîsê Keyeyanê Şehîdan û TEV-DEM’î ame xemelnayene.
Pîrozkerdena Newroze de do hemserekê Partîya Yewîya Demokratîk (PYD) Xerib Hiso û Rayberîya Meclîsê Şehîdan Selma Xelîl qisey bikerê. Sewbîna zî Koma Şehîd Xebat, Koma Şehîd Rêwan, Koma Şehîd Sabrî, Koma Raman û hunermend Alan Rêbwar û Hojîn Herîs do sehne bigîrê.
Girse bi hewayêko bi çoşe dorê adirî de çarnayîşê govende dewam keno
Amûdê
Amûde de zî şarê şaristanî û dewanê aye verê xo da meydanê Newroze yê dewa Çaxir Bazar. Komîteya Amadekar seba ke şar bieşko tewrê Newroze bibo zafê dewan rê erebe erşawit. Programê Newroze yê Amûde de do adirê Newroze hetê keyeyanê cangorîyan ra bêro wekerdene. Badê qisey kerdişan ra, Koma Agirî, Koma Serdem, Koma Şehîd Delîla, Koma Şehîd Mizgîn, hunermend Sîpan Agirî, hunermend Hemûde û hunermend Bilind do hunerê pêşkeş bikerê.
