Cagirê Hemserekanê Rêxistina DEM Partî yê Amedî Celal Alphan derheqê kombîyayîşanê şarî de dîyar kerd ke ê bi rayîrê kombîyayîşanê şarî, prosesî şarî reyde pare kenê û pîya prosesî nîqaş kenê.
Seba ke vengdayîşê Rayberê Şarê Kurdî Abdullah Ocalanî mîyanê şarî de baş bêro fehmkerdene, partîyê sîyasî û sazîyê komelkî taxe û dewan de şarî reyde yenê têhet. Partîya Têduştî û Demokrasîyî ya Şaran (DEM Partî), Têgêrayîşê Cinîyanê Azadan (TJA) û Partîya Herêman a Demokratîke (DBP) Amed de her roje dewe û taxanê merkez û qezayanê Amed de “Kombîyayîşê Şarî” organîz kenê. Cagirê Hemserekanê Rêxistina DEM Partî yê Amedî Celal Alphan derheqê “Kombîyayîşanê Şarî” de ajansê ma rê qisey kerd.
‘Ma prosesî şarî reyde pare kenê’
Celal Alphan dîyar kerd ke vengdayîşê Rayberê Şarê Kurdî Abdullah Ocalanî ra pey proses ame destpêkerdene. Celal Alphan da zanayene ke seba ke proses baş bêro fehmkerdene, înan dest bi kombîyayîşanê şarî kerdo û wina vat: “Seba ke ma ewnîyayîş, rexne û pêşnîyaranê şarî bigîrê, ma şarî reyde prosesî nîqaş kenê. Kombîyayîş hetê şarî ra bi coş yeno pêşwazîkerdene. Ma her roje tax û dewan de kombîyayîşan kenê. Nê kombîyayîşan de roje bi roje beşdarbîyayîşê şarî vêşî beno. Dewanê tewr dûr, şenik û heta merkezê şaristanî ma heme ca de kombîyayîşan virazenê. Ma cewab danê persanê şarî. Ma ewil 200 kombîyayîşî dabî vernîya xo. La ma do hûmara nê kombîyayîşan vêşî bikerê. Heta ewro ma 30 kombîyayîşî kerdê. Ma prosesî şarî reyde pare kenê û derheqê hedîseyanê neweyan de ma agahîyan danê şarî.”
‘Şar xo ra, rêxistin û Serekê xo ra bawer o’
Celal Alphan ard vîrî ke şarê kurd no 50 serrî yo xora mîyanê prosesî de yo û nê çîyî vatî: “Şarê kurd prosesî vîneno, zano û wayîr vejîyeno. Kombîyayîşan de şar zaf persan perseno û nakokîyê ke sereyê înan de yê, pare kenê. Dîwan hewl dano ke cewab bido persanê înan. Ma şarê xo reyde mîyanê parekerdişî de yê. Şar wazeno bimuso. Her çend heta ewro tu gamî nêameybî eştene zî, şar prosesî rê baş wayîr vejîyeno. Şar xo ra, rêxistin û Serekê xo ra bawer o. Şar çîyê ke hetê Birêz Ocalanî ra ameyê vatene, pozîtîf vîneno.”
‘Ma şarî seba prosesî amade kenê’
Celal Alphan dîyar kerd ke heme cayê Kurdîstsanî de heme beşanê komelî reyde mîyanê dayîşûgirewtişî de yê û wina vat: “Şar ewro paweyê gamanê pozîtîfan o. Ameyoxî de hetê dewlete ra gamî bêrê eştene zî do şar hîna baş beşdarê prosesî bibo. Ma komelê xo seba prosesî amade kenê. Seba gamî bêrê eştene ma do bixebitî.”
‘Şar paweyê nêzdîbîyayîşê dewlete yo’
Celal Alphan îfade kerd ke şarê kurdî komunan ra dûrî nîyo û wina dewam kerd: “Şarê kurdî xora bi serran o sey komunan ciwîyeno. Nê semedî ra ewro komunan pozîtîf vîneno. Şar paweyê nêzdîbîyayîşê dewlete yo. Şarê kurdî bi her hewayî amade yo.”
‘Ganî şar xo hîna zaf beşdarê prosesî bikero’
Celal Alphan waşt ke heme welatijî persê sereyê xo de pare kenê û hîna zaf beşdarê kombîyayîşan benê. Celal Alphan dîyar kerd ke ê her roje qadan de yê û qiseykerdişê xo wina qedêna: “Ma heme tewir rewşe rê amade yê. Ma zanê ke keda her kesî mîyanê aştî de ya. Aştîyêka aramî bêra do her kes aye verar bikero. Seba proses serkewo ganî şar hetkarî bido ma.”
