Endamê Heyetê Hemserekîyîye yê PYD’î Aldar Xelîl ard ziwan ke pêvajoya pêvînayişî ya bi Rayberê PKK’î Abdullah Ocalan rê ameyo destpêkerdişî seba aver şîro wa sifte hêrişê Tirkîya yê ser Rojawanî bivindero.
Hêrişê komê paramîlîterî yê girêda Tirkîya ser Rojawanî 2 aşmê ke bêmîyan domyenê. Verba hêrişê Tirkîya û hêzê paramîlîter, Hêzê Sûrîya Demokratîke (HSD), Yewîneyê Pawitişê Cinîye (YPJ) û Yewîneyê Pawitişê Şarî (YPG) pawitişê herême kenê. Şarê Rojawanî zî verba hêrişan 8ê Çeleyî de Awbendê Tişrînî de nobede gênê.
Endamê Heyetê Hemserekîyîye yê PYD’î Aldar Xelîl, hêrişê Tirkîya ser herême û qewimyayişê peynî Ajansê Welatî rê qise kerd.
Netewa Demokratîke
Aldar Xelîl ard ziwan ke verba hêrişê Tirkîya û hêzê paramîlîterî yê giredayê ci xoverdayişêko gird yeno dayêne û wina va: “Peynîya rijyayişê rejîmê BAAS’î pêvajoyêka newe Sûrîye de destpê kerd. Peynîya hêrişê HTŞ’î ser Helebî komê çeteyê yê girêdayê Tirkîya zî hêrişê Rojawanî kerdê. Plansazîya înan a bî ke Rojawan îşxal bikê la Awbendê Tişrînî de verê înan ame girewtiş û nêeşkîyayî derbas bibê. 2 aşmê ke Awbendê Tişrînî hêriş domyeno, heme şarê Rojawanî zî no şer de cayê xo gênê û pawitişê herême kenê. No xoverdayiş ya estbîyayiş ya çinbîyayişî yo. No hêriş çarçiweya armancê Tirkîya de ser herêmê pê yenê. Bi xoverdayişê şaran ê Awbendê Tişrînî dîyar bî ke projeya Netewa Demokratîke eşkena heme şaran û bawerîyan bîyara têhet.”
Rojawan seba Tirkîya nê telûke yo
Aldar Xelîl vîr ard ke Tirkîya de bi Rayberê PKK’î Abdullah rê pêvînayiş ameyo destpêkerdiş û wina qedîna: “Rayber Apo problemê Rojhîlatê Mîyanênî hemeyan ercneno û seba têmîyanîyê estî rê zî çareserîye pêşnîyaz keno. Demê ma zî ercnayişê Rayber Apo wanenê, ma dî ke çareserîya tewro rojane ya seba problemê kurd nê ercnayişî yê. Seba ci zî serra 2011î de ma xo spart paradîgmaya Rayber Apo û ser na projeya xo aver berd. Eke ewro Dewleta Tirke bi Rayber Apo rê pê bêra û dîyalog aver biba, helbet ci no bandor ser herême zî bikero. Finak serrê 2013 û 2015î de Dewleta Tirk hêrişê herême nêkerdine. Seba pêvajoyêk bi Rayber Apo rê estbî la dima pêvajo xirab bî hêrişê înan destpê kerdê. Ê do bîvînî ke Rayberîya Xoser a Sûrîyeya Rojhilat û Bakûrî seba Tirkîya nê telûke ya, hem Tirkîya hem zî Rojhelatê Mîyanênî averberdişê demokrasîye yo. Çareserkerdişê problemê kurd nê çinbîyayişê Tirkîyaye yo, têmîyanê ci seba estbîyayişê şarê tirk, ereb û heme neteweyê Rojhîlatê Mîyanênî mîsoger keno.”
