Polîsan Hemşaredarê Akdenîzî Hişyar Sariyildiz û Nurîye Aslan destbend kerdî. Polîsanê ke dormeyê şaredarî girewt, va “Qeyyum ameyo tayînkerdene.”
Hemşaredarê Akdenîzî yê Mêrsînî yê ke rayberîya Partîya Seypêyî û Demokrasî yê Şaran (DEM Partî) de yê , Hişyar Sariyildiz û Nurîye Arslan û endamê Meclîsê Şaredarîye Ozgur Çaglar, Hîkmet Bakirhan û Neslîhan Oruc keyeyê înan de destbend kerdî. Sebebê tepiştişê hemşaredaran û endamanê meclîsî nêame zanayene. Dormeyê awanîya Şaredarîya Akdenîzî zî hetê polîsan ra ameye girewtene.
‘Polîsan va qeyyum ameyo tayînkerdene’
Parlamenterê DEM Partî yê Mêrsînî Alî Bozanî yo ke kewtişê ey yê şaredarîye ame astenkkerdene, da zanayene ke polîsî zere de gerenê û wina va: “Polîsan vernîya ma girewt ke ma bikewê Şaredarîya Akdenîzî û ma ra vat ke qeyyumî qerarê qedexeyî dayo. Ma ra va ke ‘Şaredarîya Akdenîzî rê qeyyûm ameyo tayînkerdene û do keyepelê Walîtîya Mêrsînî de bêro weşanayene.’ Qeyyum xespkerdiş o, qeyyum dizdîya îradeyî yo, ma qerarê tayînkerdişê qeyyuman ê Şaredarîya Akdenîzî qebul nêkenê.”
