Hemserekê Pêroyî yê DEM Partî Tulay Hatîmoglulari û Tuncer Bakirhanî vera operasyonanê ke Mersîn de şaredarîyan kenê hedef û tede 59 kesî ameyî destbendkerdene, reaksîyon da û veng da ke hurmet bêro kerdene bi îradeyê Mersînî.
Hemserekanê Pêroyî vat: “Ma operasyonanê destbendkerdişî yê vera 59 kesan qebul nêkenê ke Şaredarê Mersînî yê Şaristanê Girdî Vahap Seçer, Şaredarê Yenîşehîrî Abdullah Ozyîgît û Şaredarê Mezîtli Ahmet Serkan Tuncer zî mîyanê înan de yê.”
Hemserekanê Pêroyî dîyar kerd ke îradeyê şarî yo ke sandiq de vejîyayo, her tim bi prosesanê edlî yeno destserronayene û vat ke “îradeyê şarî bi fîîlî ameyo vindarnayene.”
Hemserekanê Pêroyî hişyarî daye: “Ma nê metodî rind nas kenê. Wexto ke bi qeyûman dest şaredarîyanê ma ser o ame eştene, ma eynî fehmî reyde rastê yewbînan ameyî. Heqê weçînayîşê şarî ame naskerdene, la heqê îdarekerdişê kesê ke weçîna, nêame naskerdene. Eke yew ca de heqê weçînayîş û weçînîyayîşî binpay beno, sînorê ci uca de nêmaneno.”
Eşkerayî de ame vatene: “Eke îradeyê şarî tena wexto ke netîceya sandiqî goreyê çîyêkî bibo, meqbul bo, nameyê ci demokrasî nîyo. Şarê Mersînî kam weçînayo, ganî o Mersînî îdare bikero. Ganî hurmetê îradeyê şarî bêro girewtene û edlîye warê hesabpersayîşanê sîyasîyan ra bêra vetene.”
