MEBYA-DERî, çarçewaya programê vîrardişê şehîdanê aşma Gulane de, qezaya Pasûrî ya Amedî de goristanê bêkesan zîyaret kerd. Zîyaretî de rayberê komele, keyeyê şehîdan û welatî amade bîyî. Ame zanayene ke goristanê bêkesan de 90 gorê şehîdan est ê.
MEBYA-DERa Amedî bi munasebetê vîrardişê şehîdanê aşma Gulane, qezaya Pasûrî de Goristanê Bêkesan zîyaret kerd. Rayberê MEBYA-DER’î û zaf kesî tewrê programê vîrardîşî bîyî. Beşdaran bale ant rewşa goristanî ser o û ame vatene ke 90 gorê şehîdan nê goristanî de yê. Beşdaran dîyar kerd ke nê cenazeyî wextanê cîya-cîyan de bi şeklekê bêkes ameyî definkerdene, hema zî nasnameyê înan nêameyî eşkerakerdene û na rewşe seba keyeyanê ke bi serran o paweyê merdimanê xo yê,dejêko zaf giran o.
‘Heta nasnameyî eşkera bibê, ma do têkoşîn bikerî’
Hemserekê MEBYA-DER’î yê Amedî Ramazan Dengizî vernîya goristanî de qisey kerd û bale ant waştişanê keyeyan ser o. Ramazan Dengizî dîyar kerd ke wayîrvejîyayîşê goran wezîfeyêko merdimî û exlaqî yo û wina vat: “Keyeyê ma bi serran o wazenê goranê merdimanê xo ser o ezaya xo bikerî. Ma sey MEBYA-DER veng danê, ganî nê gorî bêrê pawitişe û nasnameyê înan bêrê eşkerakerdiş. Heta ke ma çareserîyêk nêvînî, têkoşîn û xebatê ma yê seba keyeyan do dewam bikerî.”
