Parlamentoyê Ewropa yê Brukselî de konferansê bi sernameyê ‘Ma pîya Îranêko demokratîk awan kenî’ dest pêkerd.
Konferansê ‘Ma pîya Îranêko demokratîk awan kenî’ ke hetê Platformê Demokratîk ê Îranî ra ameyo organîzekerdene, bi qiseykerdişê endamanê Grûba Çep, Kesk, Demokrat û Sosyalîstanê Parlamentoyê Ewropa dest pêkerd.
Zaf rêxistin, komelî Îranî ra û Rojhelatê Kurdîstanî ra yê, beşdarê nê konferansî bîyê. Seba amancê konferansî zî nê nuqtayî ameyî dîyarkerdiş:
-Seba dîyalogê mîyanê hêzanê komelkî û siyasî yê Îranî, awankerdişê qadêka demokratîk.
-Ameyoxê demokratîk ê Îranî de, cigêrayîşê rolê komel û netewan.
-Xurtkerdişê hemkarî û torra mîyanê hêzanê zafreng û demokratîkan.
– Munaqeşakerdişê temsîlkaranê bingeyînan ê awankerdişê Îranêko demokratîk.
-Ravîyartişê demokratîk, îstîfakerdişê tecrubeyanê mîyanneteweyîyan yê warê rayberîyanê zafrengî û edaletî yê demê ravîyartişî de.
-Seba amanc û ameyoxê Îranî, cigêrayîşê îmkananê alternatîfan ê demokratîkan.
-Seba ameyoxê Îranî, dîyarkerdişê nêzdîbîyayîşanê aştîyane, sivîl û şîdet û teda ra dûrî.
Koma Sosyalîst û Demokratan ra Evîn Încîr destpêkê konferansî de piştgîrîya xo ya seba têkoşînê azadî û demokratîk ê şaranê Îranî îfade kerd û wina vat: “Ganî ma sey Yewîya Ewropa paştî bidî şarê Îranî û gamê lazimî bêrê eştiş.”
Grûba Keskan ra Leoluca Orlando zî îfade kerd ke piştgîrîya seba demokrasîyê Îranî zaf muhîm a û dîyar kerd ke lazimtîya şarê Îranî bi na piştgîrîye est a.
Koma Tîfaqê Çep û Kesk ra Ilarîa Salîse bale ant muhîmîya ameyoxêko demokratîk ê Îranî ser o û dîayr kerd ke xoverdayîşê ‘Jin, Jiyan, Azadî’ wayîrê fehm û manayêko zaf xorîn o û vat ke no têkoşîn seba ‘Îranêko demokratîk û azad o.’
Koma Sosyalîst û Demokratan ra Thijs Reutenî zî hêrişê Îranî yê vera kurdan ard vîr û dîyar kerd ke ganî ê serê şêwazê awankerdişê demokrasîyê Îranî bifikirî û seba naye bixebitê.
Dima ra panelê destpêkî yê bi sernameyê ‘Awankerdişê Îranêko demokratîk de rolê mîlet û komelan’ dest pêkerd.
Konferans do bi şeklê çar panelan do pêroyê roje dewam bikero.
