8ê gulane de vera Şaredarîya Stenbolî ya Şaristanê Girdî (ÎBB) operasyonêk amebi kerdene û 33 kesî ameybî destbendkerdene. Înan ra 12 kesî ameyî girewtiş.
Serdozgerîya Komarî ya Stenbolî seba Şîrketê Dar û Peyzajî ke girêdayeyê Şaredarîya Stenbolî ya Şaristanê Girdî (ÎBB) yo, tehqîqatêk dabi destpêkerdene. Polîsan 8ê gulane de eşt keyeyanê rayber û xebatkaranê ÎBB’yî ser o. Cagirê Sekreterê Pêroyî Oktay Ozel û Sereka Daîreyê Park û Baxçeyan Tugba Olmez zî tede, 31 kesî ameyî destbendkerdene.
Nê kesî bi sucdarîya “bi amancê awankerdişê rêxistina sucî û fesadîya mîyanê îhaleyan” ameybîgirewtene. Vizêr 7 kesê destbendkerdeyî sewqê Edlîyeya Stenbolî ameyî kerdene û her 7 kesî zî bi qerarê kontrolê edlî ameyî veradayene.
12 kesî ameyî girewtiş
24 kesê bînî zî ewro sewqê edlîye ameyî kerdene. Înan ra Alkan Başçîftçî, Ekrem Ofluoglu, Fatih Yagci û Yasîn Çagatay Seçkîn bi qerarê kontrolê edlî ameyî veradayene. 20 kesî zî bi waştişê girewtişî sewqê mehkema ameyî kerdene. Nê 20 kesan ra 12 kesî ameyî girewtiş, 8 kesê bînî zî bi qerarê kontrolê edlî ameyî veradayene.
Mîyanê kesan de ke ameyî girewtiş warkênaya Dîlek Kaya Îmamoglu, Derya û mêrdeyê aye Murat Dagdevîren zî est ê.
