Wekîlê DEM Partî Omer Ocalano ke Roşanê Qurbanan de Rayverê Şarê Kurdî Abdullah Ocalan zîyaret kerdibi pare kerd ke Rayverê Şarê Kurdî Abdullah Ocalan vato ke DEM Partî partîya wayûbirayîya kurd û tirkan a û no yeno manaya newekerdişê her çî.
Birazîyê Rayberê Şarê Kurdî Abdullah Ocalan û Wekîlê DEM Partî Omer Ocalanî, birazîyê Rayberê Şarê Kurdî Abdulalh Ocalan, Alî Ocalanî û di birazîyanê ey ê bînan bi wesîleya Roşanê Qurbanan Îmrali de pêvînayîş kerdibi. Omer Ocalanî derheqê zîyaretî de ANFyî rê qisey kerd û vat: ‘’Serek manayêka cîyaye dano DEM Partî û komîsyono ke do Meclîs de bêro awankerdene girîng vîneno.’’
Omer Ocalanî ard ziwan ke pêvînayîşî saetêke ra zafêr dewam kerdo û xeylê hol derbaz bîyo. Omer Ocalanî îfade kerd ke Rayberê Şarê Kurdî Abdullah Ocalan reya verêne dezayê xo Alî Ocalan û û di domanê ey dîyê û vat: ‘’Serekî qelemêke dîyarîya domanan û mi kerde. Serekî domanan ra waşt ke wa bi îrade û xurt bibê. Serek manayêka cîyaye dano DEM Partî. O vano ke DEM Partî tena partîya kurdan nîya, partîya wayûbirayîya tirkan û kurdan a. O qalê paradîgmayêka newîye keno û vano ke seba kurdan û tirkan vurîyayîş şert o. Serek komîsyono ke do Meclîs de bêro awankerdene girîng vîneno, mana dano ci û wazeno ke pêro dormeyan de pêvînayîşî bikero.’’
