Şûbeyê OHD’yî yê Amedî bi munasebetê 15ê Gulane Roşanê Ziwanê Kurdkî eşkerayî daye û waşt ke ziwanê Kurdkî bibo wayîrê statu û ziwano fermî.
Komela Huqûqnasanê Seba Azadîye (OHD) ya Şûbeyê Amedî çarçewaya şayî û çalakîyanê 15ê Gulane Roşanê Ziwanê Kurdkî de vernîya Mehkemaya Amedî de eşkerayî daye çapemenî. Eşkerayî bi sernameyê “Statuyê Kurdkî, Perwerdeyîya bi Kurdkî” ameye dayene. Eşkerayî de endam û rayberê OHD’yî, Serekê Baroyê Amedî Abdulkadîr Guleç, Temsîlkarê rêxistinanê sîvîl û xeylê avûkatî beşdar bîyê.
Metno bi lehçeya kurmancî endama Komîsyonê Ziwanî yê OHD’yî yê Amedî Gulbahar Ateş wend û metno bi lehçeya kirmanckî zî endamê Komîsyonê Ziwanî yê OHD’yî yê Amedî Mehmet Emîn Gokdemîrî wend.
‘Kurdkî erjo tewr bingeyîn ê kurdan o’
Mehmet Emîn Gokdemîrî dîyar kerd ke heme ziwan erjê bingeyîn ê merdimîye yî û wayîrê eyn heqan î û wina vat: “Ziwanê kurdkî erjêko tewr bingeyinî yê kurdan û merdimîye yo. Bi hewa, rayîr û metodanê cîya-cîyayan, çinhesibnayîş, qedexekerdiş, asîmîlekerdiş, dorpêçkerdiş, sînordarkerdiş û hewldayîşê seba helênayîşî û orterawedaritişê ziwanê kurdkî, sucêko tewr girdî yê vera merdimîye yo. Na heqîqete ra; ganî ziwanê kurdkî, hetê pêro sazî û dezgeyanê pêro dewlet û mîyandewletan ra, bi taybetî hetê Dewleta Tirkîya ra bi hewayêko resmî bêro şinasnayene û şuxulnayîşê ey pêro qadanê komelkî û cuye de, her hetî ra azad û serbest bo.”
Waştişê seba Kurdkî
Mehmet Emîn Gokdemîrî waştişê seba naskerdiş û statuyê Kurdkî zî rêz kerdî û nê çîyî vatî: “Ma sazî, dezgeyî û dorûverê ke cêr de yê, bi nê bingeyî wazenî ke:
1- Ziwanê kurdkî bi hewayêko resmî bêro şinasnayene û bibo wayîrê statuyî.
2- Ziwanê kurdkî verdibistanan ra heta unîversîteyan bibo ziwanê perwerdeyî.
3- Nameyê pêro ca û çîyanê ke eslê xo de kurdkî yê la sey tirkî ameyê vurîyayene, do reyna bibê kurdkî.
4- Pêro astengîyê qanûnî û cuye yê ke vera ziwanê kurdkî est ê bêrê wedaritene, ziwanê kurdkî her ca de serbest û azad bo.
5- Seba azadî û serbestîya ziwanê kurdkî ya menda statuyê kurdan ê huqûqî û sîyasî bêro qebulkerdene.
Vengda rayedar û sazîyanê kurdan
Mehmet Emîn Gokdemîrî da zanayene ke bingeyê awankerdişê komelêka demokratîke, azad û aştîyane ser o, ê veng danî pêro rayedaranê Dewleta Tirkîya û wina vat: “Nê waştişanê tewr merdimîyan hem qanûno bingeyîn û qanûnanê xo de qebul bikerê, hem zî înan pratîkî de bîyarê ca. Reyna ma veng danê pêro hereket, partî, sazî, dezgeh, platform, înîsîyatîf û dorûveranê kurdan, netewaya kurdan û pêro dorûveranê merdimîyepawitoxan ke seba ke nê waştişî bêrê ca û seba pawitiş û averşîyayişê ziwanê kurdkî têkoşînê xo her ca de û her qade de berzêr, xurtêr û hîrayêr bikerê û nê waştişan sere de xo mîyan de bîyarê ca; ziwanê kurdkî bikerê ziwanê pêro qadanê têkoşîn, xebate û cuya xo.”
Eşkerayî bi vatişê sloganî “Bê ziwanî cuye nêbena” qedîyaye.
