Rayberê Şarê Kurdî Abdullah Ocalan derheqê kombîyayîşê verên ê Heyetê Teqîb û Tesbîtkerdişî û îdia û îthamê derheqê xo de mesajêke vila kerd û wina vat: “Heyetê seba prosesî vizêrî kombîyayîşê xo ya verêne viraşte. No nîşan dano ke proses bi gamanê zexman aver şono. Ma resayî qonaxêko krîtîk. Vatiş û îdiayê ke derheqê mi de medya û medyaya dîjîtal de yenê vilakerdiş, raşt nîyê. Nê parekerdişî têgêrayîşê provokatîf ê hemverê prosesî yê.”
Rayberê Şarê Kurdî Abdullah Ocalan, derheqê kombîyayîşê verên ê Heyetê Teqîb û Tesbîtkerdişî ke çarçewa qanûnê “Xurtkerdişê paştîdayîşê neteweyî û yewbîyayîyîşê komelî” de ameybî viraştene û derheqê îdia û îthamê nerastan nê çend rojanê peyênan de ke medyaya dîjîtal de yenê vilakerdiş de seba ke raya pêroyî reyde bêro parekerdiş, eşkerayîyêke heyetê DEM Partî yê Îmralîyî rê erşawite.
Mesajê Abdullah Ocalanî wina yo:
“Birêz Serekkomar û birêz Devlet Bahçelî îradeyê xo bi hawayêko zexm nîşan da. Vengdayîşê mi ser o, têkoşînê çekdarî peynî dîya ci. Partîyanê sîyasîyan zî paştîdayîşêko tarîxî da. Bi nê hawayî qanûnê “Xurtkerdişê paştîdayîşê neteweyî û yewbîyayîşê komelî’ ame qebulkerdene. Heyetê ke goreyê nê qanûnî ameye ronayene, vizêrî kombîyayîşê xo yê verên viraşt. No nîşan dano ke proses bi gamanê zexman aver şono. Ma resayî qonaxêko krîtîk. Nê wextê tarîxî de taye dorûverî seba raşîyayîşê prosesî xebetîyenê. Nê hewldayîşê înan vera mi komplo yo. Vatiş, vîdeo, name, belge û notê ke medya û medyaya dîjîtal de yenê vilakerdiş û bi mi ra yenê giredayene rast nîyê. Nê parekerdişî têgêrayîşê provokatîf ê hemverê prosesî yê. Ez do hewldayîşê xo yê seba awankerdişê aştîya komelkî û huqûqê wayûbirayîye hîna zaf aver berî. Ez her kes û her terefî dawet kena ke bi ruhê wayûbirayîye, bi hişmendî û bi hesasîyet nêzdî bibê û hewl bidê.
25ê Tebaxe 2026 Abdullah Ocalan”
