Meşyoxê Amarayî 3 rojê ke ver bi Amarayî ra meşîyenê. Zaf ciwan Kurdistan û Tirkîya ra beşdarî meş bîyê. Hetê ciwanan kal û pîr zî est ê. Meşyoxê ke beşdarî meşî bîyê dîyar kerd ke ê keye bi keye azadîya Rayberê xo bîyarê ziwan û no meş zî do bibo wesîleya Azadîya Rayberî.
Meclîsê Ciwanan ê DEM Partîye 1ê Nîsane de bi wesîleya 76. Serrgêra Rojbîyayîşê Rayberê Şarê Kurd Abdullah Ocalanî Warê Şêx Seîdî ra ver bi dewa Amarayî ra dest bi meşî kerd. Ciwan roja yewin dewa Pirîmçikî ver bi Sêwregî ra meşîyayê. Roja diyine meşyox Sêwregî ra ver bi Curna Rêş û şaristanokê Elîgorê Pirsûsî ra meşîyayê. Ciwan dew û qezayê ke vindertî hetê welatijan bi girseyî û coş ameyê pêşwazkerdiş. Meşyox, meşê xo ra bi coş û kelecan dewam kenê. Meşyoxî nê meşî de azadîya fizîkî ya Rayberê Şarê Kurd Abdullah Ocalanî wazenê. Meş de tena ciwanî çin ê, kal û pîrî zî est ê.
Meşyoxê ke beşdarî meş bîyê ser armancê meşî ajansê ma rê qise kerdê.
Azadîya Rayber azadîya şarê kurd a
Kalî 83 serrê Abdulhafiz Çîftçî ke hetê ciwanan beşdarî meş bîyo dîyar kerd ke ê seba azadîya fizîkî ya Rayberê Şarê Kurd Abdullah Ocalan Colemêrgî ra beşdarî meş bîyo û wina va: “Ez 83 serra ya, ez seba ke şêrî Amara û rojbîyayîşê Serekê xo pîroz bikerî beşdarî meşî bîya. Ez biba se serra zî, do paştê Serekê xo de biba. Serek çîn bo cuya ma zî çîn a, ma seba Serekê xo cuyenê. Hetanî ke Serek azad nêbo ma zî azad nêbenê, azadîya Serek azadîya şarê Kurd a. Bi armancî ez bi şarê xo ra azadîya Serekê xo biwazo meşîyeno. Ez wazena bi şarî ra rojbîyayîşê Serekê xo pîroz bikera. No meş do mesaj bido pêroyîya şarê Kurdistan û Tirkîya ra. Êdî bindestî bes o, ma do bi Serekê xo ra azad bibê. Seba Serekê xo ma do her tim xover bidê. No meş 10 roj zî bidomo, ez do seba Serekê xo bimeşo.”
‘Ma Amedî ra dest bi meşî kerd, seba ke Amed zerrîya kurdan a’
Yew zî beşdarî meş bîya ciwan bi nameyê Hîvron Taştan a, ard ziwan ke seba azadîya Rayberê Şarê Kurd Abdullah Ocalan meşîyena û wina domna: “Ez Wanî ra ameya, beşdarî meşî bîya. Seba azadîya birêz Abdullah Ocalan û şarê kurd beşdarî meş bîya, hêvîdar a ke ma do biresê armancê xo. Ma Amedî ra dest bi meşî kerd, seba ke Amed zerrîya kurdan a. Ma do şîrî Amara rojbîyayîşê Serekê xo pîroz bikerê, ma hêvîdarê ke no meş do bibo wesîleya azadîya Rayberê ma. Ciwan wa her dem ver de bibê, ewro Rayberê Şarê Kurd Abdullah Ocalan vengdayîşêk ronayo verê ma. Ma zî seba hetkarîye bidê nê vengdayîşî rê mîyanê têkoşînî de yê.”
Rojbîyayîşê Serekî rojbîyayîşê ma yo
Meşyox Sacîd Ozdemîr zî da zanayîş ke do seba azadîya Rayberê xo xoverdayîşê xo gird bikerê û wina qedîna: “Ma seba Serekê xo meşîyenê, ma do şîrî Amara û rojbîyayîşê Rayberê xo pîroz bikerê. Rojbîyayîşê Serekî, rojbîyayîşê ma yo. Seba ke Amed paytextê şarê Kurd o, ma zî Amed ra destpê kerd. Heta ke Serekê ma azad nêbo, meşe ma ti bi rayî peynî nêbeno. Ma do her dem bimeşî û waştişê ma, azadîya fizîkî ya Serekê ma yo.”
