Serekê Herêma Kurdîstanî ya Federe Nêçîrvan Barzanî badê îlankerdişê qeraranê Kongreya PKK’yî ya 12. eşkerayîya xo de dîyar kerd ke rîpelêko tarîxî ameyo akerdene.
Serekê Herêma Kurdîstanî ya Federe Nêçîrvan Barzanî derheqê qeraranê kongreya PKK’yî de eşkerayîyêk daye. Barzanî dîyar kerd ke ê paştî danê qerarê fesihkerdişî û ronayîşê çekan û no qerar do rîpelêko tarîxî herême de akero.
Nêçîrvan Barzanî mesajê xo de wina vat: “Ma paştî danê qerarê PKK’yî ya xofesihkerdişî û ronayîşê çekan û goş danê vengdayîşê Birêz Ocalanî û ey sey gamêka çarenusî vînenî ke rîpelêko newe herême de akeno. Na game nîşaneyê resayîşê sîyasî yo û dîyalogê rastîn rê rayîr akeno ke cuyêka pîya û aramîye Tirkîya û serasnerî herême de xurt keno.
‘Ma amade yî ke paştî bidê’
Nika demê ey o û çimê ma pêrûnan pa yo ke na gama muhîme bi gamanê bînan ê pozîtîf û lazim ê heme hetan eleqedar kenê, seba înan cewab bêro dayene. No zemînêko rast û dirust ano meydan û beno bingeyê aştîyêka menda û heme dej û zilmê des serranê peyênan qedêneno û herême ver bi asoyêko newe yê averşîyayîşî beno. Reyna seba dewamê pêşkêşkerdişê heme hewayanê hetkarî û hemkarî seba serkewtişê nê fersendî tarîxî ma heme amadebîyayîşê xo dîyar kenî.”
