Çemê Sîyayî ke qezayê Şemrexî ya Mêrdînî de yo, semedê xemsarîye qirşan û gemar biyo. Sey ke cayê seyranî yo zî kesêk ey pak nêkeno û ey rê wayîr nêvejîyeno. Çem û seyrangeh qirş ra aseno.
Çemê Sîyayî qezayê Şemrexî ya Mêrdînî de herikîyeno. Mîyanê gelî û devîyan de herikîyeno. Cayêko zaf weş o. Hem awe ey weş a û hem zî hêniyê ey weş a. No ca hemver de cayê seyranî yo. La bêwayîr û bêkes ameyo veradayene. Derûdorê çemî û mîyanê çemî pîlqan, şûşeyê plastîkî yê awe, her cureyê gemarî tede est o.
lêminkerdiş û gemarê serê awe û qinarê çemî yew hetî ra heme weşîya nê cayî xira kerdo, hetê bînî ra zî merdimî nêşenî semedê boya gînî verê çemî û bînê daran de boya xo bigîrî. Kam ke şoro uca seyrana xo keno, qirşê xo uca de veradano û no qirş heme keweno mîyanê awe û kenarê çemî çop bîyo. Awa çemî çop ra asena.
Şaredarî xemsar î
Sey ke no çem mîyanê sînoranê qezayê Şemrexî yê Mêrdînî de herikîyeno zî, ne Şaredarîya Şaristanî ya Pîle ya Mêrdînî ke hetê qeyumî ra ameya destserronayîş, ne zî Şaredarîya Şemrexî çopî pak nêkenî. No çopê ke ameyo pêser û lêmînîya çemî de xemsarîya rayedarî xo mojnena. Tenya ne her di şaredarî, vera de ekolojîst û dezgehê xo zî vera na rewşî de xemsar hereket kenî.
Boya qirşî vila bena
Semedê nêweşî vila nêbo û cayê seyranî de boya qirşî vila nêbo, dezenfektekerdişî zî nêno kerdiş. Coka boya lêmînî derûdorî de bîya vila.
Projeya viraştişê derûdorê çemî vinderta
Ma eleqedarê meseleyî xo resna Hevşaredara Şemrexî Kudret Uçuk û lêmînkerdişê çemî ey ra persa. Kudret Uçuk dest nîşan kerd ke ê lêmînkerdişê çemî nêzdî ra teqîb kenî û eleqedarê mesele yê û wina va: “Derfeta ma çin a. Ma hewtayêk de yew roj di rojan pak kenî. La hewna na yew qiym nêkeno. Miletê ma yeno û lêmîn keno. Gerek miletê ma zî bi dîqet bo. Gerek Şaredarîya Şaristanê Girdî hetkarî bido ma. Qewetê şaredarîya ma qiym nêkeno. Verî ke qeyum bêro, ma û şaredarîya şaristanê girdî waşt ma derûdora ey virazî. Ma projeyêko weş çemî rê amade kerd. Projeya ma vînderteya. Badê ke qeyum ameyo proje vîndert. La nika derfeta ma qiym nêkena. Ma zî ya lêmînî û çopî vînenî û ma zî ci ra razî nîyê. Ma wazenî her kes baldar bo û çopa xo derûdor de nêverado.”
