Westayê dêsê kerreyan Mehmet Sînan Çelîk ke karêko zaf zehmet keno, dîyar kerd ke o heqê nanê xo kerreyan ra vejeno û karê înan hem ekolojîk o û hem zî zerar nêdano xoza. Welatij Suleyman Salgucak zî îfade kerd ke dêsê kerreyan hem saxlem o û hem zî erjan o.
Kurdîstan û Tirkîya de her ke şono vayîya hacetanê awankerdişê awanîyan vêş bena. Riyê vaybîyayîşê asin, çîmento, xîz û çîyê bînan ra ke înşaatan de yenê şuxulnayene, êdî şarî verê xo dayo şuxulnayîşê kerreyan. Şirnex de zî welatijî êdî hem seba saxlemî hem zî seba erjanî dêsanê keyeyan kerreyan reyde virazenê. Şirnex de riyê kêmbîyayîşê westayanê dêsî ra , xeylê westayî teberê şaristanî ra yenê û tîya de xebitîyenê. Mehmet Sînan Çelîk ke Amed ra yo xeylê merdimanê xo reyde Şirnex de xebitîyeno. Mehmet Sînan Çelîkî îfade kerd ke 5 serrî yo Şirnex de nê karî keno û vat: “Karo ke ma kenê zaf zehmet o. Serê sibayî ma rew yenê kar. Ma karê viraştişê dêsî kenê. Ma şiknenê û înan kenê dês. Goreyê zehmetîya karî ma pereyêko vêş gênê. Destheqê ma roje de 2500 TL yo û wayîrê karî werd, çîyanê şimitişî û cayê rakewtişî ma rê eyar keno.”
‘Beton zerar dano xoza’
Mehmet Sînan Çelîkî dîyar kerd ke dêsî ke ê virazenê ê betonî ra başêr ê û wina vast: “Nika demê qumî de çeman bişuxulnê o beton çend serran ra pey beno sey herre. Reyna xeylê cayan de êdî kanê kerreyan ameyê akerdêne û ê kerreyan kenê qum. La no zerar dano xoza. Ma zafane kerreyan mîyanê erdî ra vejenê. Hem erd pak beno hem zî ma xoza pawenê.”
Mehmet Sînan Çelîkî tewr peyên îfade kerd ke zafaneyê şarî riyê vaybîyayîşê asin, çîmento, qum û ûsn. êdî nêeşkeno awanîyan virazê. Hetê vaybîyayîşî de mabênê karê ma û karê betonî de se ra 50 cîyayî est a. Bi serran o ma tîya de xebitîyenê. Ma keda xo debara xo kenê. Ma nanê xo kerreyan ra vejenê.
‘Beton zaf vay o’
Welatijo ke dêsê derûdorê baxçeyê ey yeno viraştene Suleyman Salgucak zî îfade kerd ke Şirnex de 4 santralê betonî est ê û vat: “Nê her 4 santralê betonî xo kerdo yew û betonî vay roşenê. Êdî Şirnex de şar zî kerreyanê erdê xo vejeno û keno sey dêsê hewşî Hem saxlemêr o û hem zî erjanêr o.”
