Nameyê tayê kesanê ke tarîxanê cîya-cîyayan de cuya xo vîndî kerda zî tehqîqatê HDK de ca gênê. Yeno zanayene ke nîzamnameyê HDK seba ke “maneno ya DTK’yî” bîya sedemê sucdarkerdişî.
Dozgerîya Komare ya Îstanbulî çarçewaya tehqîqatê de ke vera Kongereya Demokratîke ya Şaran (HDK) ra dest pêkerdo, 18ê çele de sereştişê keyeyan de 54 kesî ke mîyanê înan de rojnameger, sendîkager, hunermed û sîyasetmedarî est ê, tepişîyayî. Tehqîqat, serra 2022î vera HDK’yî de ke merkezê ci Tekîrdag bi û vera HDK dest pêkerdo û o wext 36 kesî ameybî tewqîfkerdiş, ey ser o awan beno. Kesê ke ameyê tepiştiş, îfadeyanê emnîyetî de derheqê fealîyet, kom û kongre û aktîvîteyanê HDK’yî de persî ameyê kerdene ke beşdar bîyê yan nêbîyê.
Yeno zanayene ke derheqê 4 hezar û 753 kesan de bi îdîaya “endamtîya rêxistine” tehqîqat dest pêkerdo û tehqîqatê de ke merkezê ci Îstanbul o nameyê hezar û 640 kesî vîyareno. Çarçewaya tehqîqatê ke nameyê kesanê ke merheleya awanbîyayîşê HDK’yî de ca girewto tede est o, nameyê tayê kesanê ke cuya xo vîndî kerda zî bale anceno. Mîyanê nameyê ke lista tehqîqatî de ca gênê ra yew sîyasetmedaro ke serra 2023î de Stenbol de bi krîzê qelbî cuya xo vîndî kerd Fener Gunana yo.
Herçend tehqîqat reseno serra 2022î zî, nameyê Alî Denîz Kiliçî zî ke 2016î ra nat Hepisxaneyê Sîlîvrî de girewteyo, tehqîqat de vîyareno.
