Avûkatê Rayberê Şarê Kurdî Abdullah Ocalanî Muharrem Şahînî seba heqê hêvîyî qisey kerd û vat: “Gerek bêvindertiş, ne meşte ne bîro, ewro ca de bîyarê ca û birêz Ocalan azad bo û bêro komelî mîyan, bêro şarê xo mîyan.”
Avûkatê Rayberê Şarê Kurdî Abdullah Ocalanî Muharrem Şahînî derheqê heqê hêvîyî û proseso ke 27ê sibate de bi vengdayîşê ‘Aştî û Komelo Demokratîk’ ameyo dest pêkerdene, ajansê ma (AW) rê qisey kerd.
‘No karê ma pêrûnan o’
Avûkat Muharrem Şahînî behsê heqê hêvîyî kerd û dîyar kerd ke wexto ke merdim yeno dinya heqê xo est ê, no zî sey ê heqan o û wina dewam kerd: “No kar karê ma pêrûn o. Verê pêrûne karê huqûqnasan o, huquqşinasnayan o. Wexto ke merdim yeno dinya heqê ci est ê. Nê heqan mîyan de qandê ke biciwîyo, werdişê ci est o, cayo ke rakeweno sitarê ci est o. Ey ra tepîya gerek qandê ciwîyayîşî hêvîya ci biba, omidê ci bibo ke bieşkîyo cuye mîyan de rayîrî ra şiro. No proseso newe yo ke est o, qandê ûmişbiyayîşê civakî no çîyêdo bol gird o. No huqûq ra zî gird o. No çîyo ke hetanî ewro ma waştêne, ma vatêne wa banê ma bibo, wa karê ma bibo no çîyê de wina zî nîyo, no çîyêdo daha vêşî gird o.”
‘Qandê qedîyayîşî lejî ganî Abdullah Ocalan azad bibo’
Muharrem Şahînî qiseykerdişê xo wina domna: “50 serrî yo no lej o ke nê welatî de dewam keno la ewro eke na ûmişey biba, no lej qedîyayîşê ci est o. Qandê qedîyayîşê nê lejî birêz Ocalanî çîyêk nawo ma pêrûne ver. Vano ke ‘Şima zî karê xo bikerê. Şima zî çi keweno milê şima ser ey bîyarê ca. Verê pêrûne no heq huqûqî yo. Huqûq çîyêdo teng o, bol gird nîyo. Demokrasî, civak, daha gird o. Aye ra gerek no heq bêro ca. Verdê pêrûne gerek pawitoxê birêz Ocalanî şirê ey het, pêvînayîşî bîyarê ca. Ey ra tepîya heyetê sîyasî şirê, ê bînî zî şirê. La wextê vindertîşî çin o. Sedemê çi çî beno wa o bibo. Yew merdim wexto ke kewt hepisxane, gerek yew heqê ey bibo ke reyna bêro civakî mîyan, bêro komelî mîyan û bişekîyo ciwîyayîşê xo bi domno. Aye ra no heq ewro est o. Ma zî hetê huqûqê Ewropa de rê. Yanî îmzaya Tirkîya zî binê nê qerarî de est a û qebul kerda.
Gerek bê pawitene, ne meşte ne bîro ewro hema nê heqî bîyarê ca û birêz Ocalan azad bo. Bêro komelî mîyan, bêro şarê xo mîyan. Hem qandê dinya hem qandê memleketî çi ey destî ra ameyo heta nika kerdo û naye ra tepîya zî do bikero. Hêvîya ma ney rê tam a. Ma pawitîşêde ey ser o yê ma ey pawenê.”
