MKGyî seba serrgêra 26. wefatê temsîlkara Kovara Ozgur Halkî ya Amedî Nesrîn Teke çalakîya vîrardişî organîze kerd. Endama MKG’yî Medîne Olçen dîyar kerd ke ê do bi qelema xo herinda Nesrîn Teke ser o bê û vat: “Kesê ke rayîrê heqîqetî de bîyê meşale û rayîrê ma roşnî kerdo, do nêrê vîrrakerdiş.”
Temsîlkarê Kovara Ozgur Halkî ya Amedî Nesrîn Teke ya ke tewrê çalakîya “Şima nêeşkenê rojê ma tarî bikerê” verê komployê hemverê Rayberê Şarê Kurdî Abdullah Ocalan amebî dest pêkerdene bîbî, serra 2000î de cuya xo ra bîye. Komeleya Rojnamegeran ê Cinîyan a Mezopotamya (MKG), Nesrîn Teke serrgêra 26. wefatê aye de, Mezelanê Berê Mardînî ê qezaya Yenîşehîrî ya Amedî de, mezelê aye ser o çalakîya vîrardişî organîze kerd. Endam û rayberê MKG’yî, keyeyê Nesrîn Teke, Dayîkê Aştî û xeylî kesî tewrê çalakîye bîyî.
‘Wa êdî zerrîya dayîkan nêvêşo’
Vîrardiş, bi rêzgirewtîşê seba cangorîyanê azadîye dest pêkerd. Çalakîya vîrardişî de Nezahat Teke derheqê serrgêra kêna xo de qisey kerd û wina vat: “26 serrî ney, 126î zî derbas bibê ma do şopê aye ser o bi. Ez hêvî kena ke tira pey, dayîkî mezelê gedeyanê xo ser o nêlornê. Bi hezaran dayîkî estê ke mezelê gedeyanê înan çin o. Ez kêfweş a ke ez eşkena bêra mezelê kêna xo ser û aye de qisey bikera. Wa tu dayîkî nêbermê û tu ciwan nêkewê binê herre. Mi di sazî dabî Nesrîne. Mi aye ra vatbi ke ti baş biba ez do Kovara Ozgur Halkî kuçe bi kuçe vila bikera, aye zî mi ra vat ‘seba ke dayîkî nêbermê bixebite’. Ez do heta peynîye sozê xo ser o bî. Ez nêeşkaya sozê xo yo bînî bigrî, mi ra vatibi ti do nêbermê. Eya, mi cenazeyê aye de xo ver da. Mi nêzanêne ke dejê ewladî hende giran o. Heta ke ez weş bî, ez do rayîrê Nesrîne ser o bî, ez do sozê xo bigêrî. Ez hêvî kena ke vengê dayîkan bireso rayedaran û fam bikê ke zerrîya dayîkan çiqas vêşena.”
‘Bî meşale û rayîrê ma roşnî kerd’
Nameyê MKG’yî ser o Medîne Olçen qisey kerd û wina vat: “Ma şehîda xo bi rêzdarî vîr anê. Kesê ke rayîrê heqîqatî de bîyî meşale û rayîrê ma roşnî kerd, ma do xo vîr ra nêkerê. Sey rojnamegeranê cinîyan, rixmê heme zextan zî ma do bi qelema xo, şopê înan ser o bê. Ma do bibê şopdarê heqîqetî kesê ke bi keda xo nê rayîrî de cuya xo ra bîyî.”
Vîrardiş bi kerdişê duayan û ronayîşê vilekan qedîya.
