Mazlum Ebdî dîyar kerd ke prosesê entegrasyonî resayo merheleyanê peyênan û hêrişê sabotaj û astengkerdişê qetî qebul nêbenê.
Musteşarê Serekkomarîya Sûrîye Mazlum Ebdî şarê Dirbêsîye yê Rojavayî reyde kom bî. Kombîyayîş de averşîyayîşê merheleya nikayine û rewşa peyêne ya herême ameyî munaqeşekerdiş.
Mazlum Ebdî kombîyayîş de bale ante muhîmîya averberdişê xebatanê hemparan ser o; no seba serkewtişê prosesê entegrasyonî û pawitişê destkewteyanê 15 serranê peyênan lazim o. Mazlum Ebdî dîyar kerd ke prosesê entegrasyonî heme komelanê herême, yanî ereb, kurd, suryanî-asûrî û armenîyan û heme karmendanê dezgehanê Îdareyê Xoserî gêno mîyan xo. Goreyê Mazlum Ebdî amancê prosesî no yo ke temsîlbîyayîşê heme hetanê eleqedaran dezgehanê dewlete de bêro garantîkerdiş.
‘Cehdê sabotajkerdişê prosesê entegrasyonî qebul nêbenê’
Mazlum Ebdî taybetî dîyar kerd ke viraştişê çalakîyanê aştîyaneyan heqê her kesî yo û dewlete do waştişanê hemwelatijan verê çiman de bigîro. La Mazlum Ebdî îfade kerd ke cehdê sabotajkerdiş û astengkerdişê prosesê entegrasyonî qebul nêbenê; proses resayo merheleyanê peyênan. Mazlum Ebdî venga heme komelanê herême da ke yewîya xo bipawê, xebatanê aktîfkerdişê dezgehanê dewlete rê piştî bidê û vera cehdanê fitne û parçebîyayîşî vinderê.
Peynîya kombîyayîşî de Mazlum Ebdî keyeyan ra waşt ke domananê xo rê piştî bidê ke şêrê mekteban. Mazlum Ebdî va ke ganî kişta erebkî de kurdkî zî bêro musnayîş û bale ante muhîmîya pawitişê ziwanê dayîke û averberdişê estbîyayîşê ey yê perwerde ser o. Mazlum Ebdî peynî dîyar kerd ke hetê ke wazenê herême ver bi cîyayîye û parçebîyayîşî bero, xizmetê feydeyanê neteweyî û îstîqbalê herême nêkenê.
