Nuştox Mehmed Uzun serrgêra 19. yê wefatê xo de mezelê ey ser o ame vîrardiş. Hemsereka Komeleya Nuştoxanê Kurdan Herdem Merwanî vîrardiş de qisey kerd û wina vat: “Ma do qelema ey ya bierje bipawê. Nesilê neweyî rêça nuştoxanê ma de şonê û bi eynî hîs wayîrê kurdkî vejîyenê.”
Komeleya Nuştoxanê Kurdan bi munasebetê serrgêra wefatê nuştoxo kurd Mehmed Uzunî Goristanê Berê Mardînî de mezelê ey ser o programêk vîrardişî viraşt. Keyeyê Mehmed Uzunî, hemşaredarê Şaredarîya Girde ya Amedî, endam û temsîlkarê sazgehanê sîvîl ê komelkî, rayberê partîyanê sîyasîyan û xeylî nuştoxî tewrê programî bîyî. Herdem Merwanî û birayê Mehmed Uzunî Mustafa Uzunî program de qisey kerd.
‘Ma do wayîrê keda înan vejîyê’
Herdem Merwanî dîyar kerd ke Mehmed Uzun zî kesan ra yew o ke seba kurdkî têkoşîyayî û wina vat: “Sey Komeleya Nuştoxanê Kurdan, heta ke kurdkî û yew kurd zî bibo, ma do wayîrê keda înan vejîyê û qelema înan ya bierje bipawê. Nesilê neweyî do rêça înan de şêrê û bi eynî hîs wayîrê kurdkî vejîyê. Ma tena qiseykerdiş de ney, pratîkê xo de do na dewa dewam bikerê û biresnê nesilanê neweyan.”
Birayê Mehmed Uzunî Mustafa Uzunî sipasîyê heme tewrbîyayoxan rê kerd ke roja winasî de înan tena nêverdayî. Embaz û hogirê Mehmed Uzunî zî mezelî ser o behsê vîrameyîşanê xo yê ey reyde kerd. Tewrbîyayoxan mezelê Uzunî ser o vileyî ronayî û program qedîya.
Derheqê Mehmed Uzunî de
Mehmed Uzun 1953î de qezaya Sêwregi ya Riha de ameyo dinya. Ey 1977î de şi Swêd û zaf kitabî nuştî. Mehmed Uzun 11ê teşrîna verêna 2007î de Amed de wefat kerd; wefatê ey ser o 19 serrî vîyartî. Mehmed Uzun nuştoxêko kurd bî ke averşîyayîşê edebîyatê kurdkî yê modernî de, taybetî warê romanî de, rolêko muhîm kay kerd. O bi nuşteyanê xo yê kurdkî û cehdanê xo yê averberdişê ziwanê edebî yê kurdkî yeno naskerdiş.
