Amed – Komeleya Nuştoxanê Kurdan bi munasebetê serrgêra wefatê nuştox Mehmed Uzunî nawîyayîşê “Dokumantasyonê Vîrê Ziwanî” akerd. Qiseykerdişanê programî de ame dîyarkerdiş ke name û keda Mehmed Uzunî û heme nuştoxanê kurdan ke wefat kerdo, vîrî ra nêvejîyenê.
Komeleya Nuştoxanê Kurdan Kitabxaneyê Mehmed Uzunî yê Parka Sumerî ya qezaya Yenîşehîrî ya Amedî de nawîyayîş akerd. Keyeyê Mehmed Uzunî, nuştox, edebîyatkar, endam û temsîlkarê sazgehanê sîvîl ê komelkî û xeylî kesî tewrê akerdişî bîyî. Hemsereka Komeleya Nuştoxanê Kurdan Herdem Merwanî akerdiş de qisey kerd. Aye dîyar kerd ke çiqas behsê cuye û edebîyatê Mehmed Uzunî bikerê zî tim kêm maneno û ser nameyê komela ra xêrameyîşê tewrbîyayoxan kerd.
‘Name û keda Mehmed Uzunî do tim ganî bimano’
Hemsereka PEN’a Kurd Rojbîn Perîşane dîyar kerd ke seba vîrardişê stunêko xurt û berz yê edebîyat û ziwanê kurdkî, wayîrê qelema zernêne Mehmed Uzunî ameyê têhet û wina vat: “Mehmed Uzun tena romannuştoxêk nêbî; o eynî wextî de afirnayoxê roşnîyêk bî. Demêko ke ziwanê ma qedexe bî û binê asîmîlasyonî de nalîyêne, ey qelema xo sey çekêk kulturî û hunerî girewte dest û heme dinya rê mojna ke kurdkî dewlemend a û eşkena edebîyatêko modern awan bikero. Ewro Mehmed Uzun mîyanê ma de nêbo zî vengê ey rîpelanê kitabanê ey de, rihê kurdkî de û vîrê nesilanê neweyan de bi hêz dewam keno. Heta ke qelema kurdkî bixebitîyo û kurdkî biciwîyo, name û keda Mehmed Uzunî zî do tim ganî bimano.”
‘Ganî ma înan vîrî ra nêvejê’
Hemşaredarê Amedî Mehmet Emîn Ayî zî dîyar kerd ke nesilê neweyî û ciwanê kurdan do edebîyat û berardişanê Mehmed Uzunî û heme nuştoxanê kurdan bi nuştiş û têkoşînî gandar bikerê. Ayî vat ke tena rojanê vîrardişî de ney, tim û taybetî Prosesê Aştî û Komelê Demokratîkî de ganî nameyê nuştox û hunermendan vîr de ganî bimanê û nameyê înan de xebatî bêrê kerdiş.
‘O pêşengê edebîyatê modernî yo’
Ziwanzan Zana Farqînî îfade kerd ke wexto ke behsê edebîyatê kurdkî yê modernî beno, Mehmed Uzun yeno vîrê her kesî: “O pêşengê edebîyatê kurdkî yê modernî yo; keda ey bêemsal a û vîrî ra nêvejîyena. 90an de wexto ke ma dest bi çapkerdişê rojnameyê Azadîya Welate kerd, tu kes çin bî ke destê ma bigîro. Zaf nuştoxê ma mecbur mendî şîyê teberê welatî û ma bêkes mendî. Komelêk tena bi ganîyanê xo ney, bi pêşeng û nasanê xo serberz o; ma zî bi Mehmed Uzunî serberz ê.”
Dima nameyê keyeyî ra waya û birayê Mehmed Uzunî qisey kerd û behsê cuye, ziwan û edebîyatê ey û vîrameyîşanê xo kerd.
Program bi dayîşê plaketan nuştoxa kurd Mizgîn Ronake û birayê Mehmed Uzunî Mustafa Uzunî rê û bi kilamanê dengbêjan qedîya.
