Îstanbul – Komeleya Wendekaran ya Kultur û Hunerî ya Arîn bi coş ame akerdiş û no mesaj ame dayîş: “Ma do pîya rayra şêrê; ma do pîya ser bikewê.”
Qezaya Fatîh ya Îstanbulî de Komeleya Wendekaran ya Kultur û Hunerî ya Arîn ame akerdiş. Xeylî ciwanî bi kincanê xo yê kurdkî komele de amê têhet. Ciwanan govende çarna û akerdişê komele pîroz kerd. Komele do babetanê kultur û hunerî ser o dersan bido. Badê govende eşkerayî ame dayîş; endamê komele Mehmet Yigitî eşkerayî wende.
‘Ma do pîya rayra şêrê; ma do pîya ser bikewê’
Mehmet Yigitî dîyar kerd ke ganî dezgehê perwerdeyî warê kulturî, zanistî û komelkî de kalîteya komelî aver berê û wina vat: “Sîstem wazeno ke girseyêko bindest, sernerm û pasîf biafirno. Sey wendekaran ma no ferzkerdiş red kenê û ewro tîya amê têhet ke alternatîfêk awan bikerê. Unîversîteyî ganî bi mîrasê xo yê tarîxî rolê xo yê komelkî bîyarê ca; la ewro bi talîmatanê fermîyan cehd beno ke wendekarî bêrê kontrolkerdiş û înan ser o teda bêro kerdiş. Arîn de do dersê muzîkî yê sey tembûr, gîtar û pîyanoyî û kursê kurdkî û îngilîzkî bibê. Do atolyeyê perwerdeyî yê jîneolojî, felsefe, tarîx û sporî bêrê viraştiş. Wendekarî do bi hemkarîya komunalîteyî xebata kolektîfe û projeyanê girdan awan bikerê. Ewro ma pîya rayîrê hezar gaman de gamêk newe erzenê. Ma do pîya rayra şêrê; ma do pîya ser bikewê.”
Program bi govende qedîya.
