AMED – Mehmet Olmezî derheqê Fuarê Kitaban ê Amedî yê 10. û muhîmîya dîjîtalîzekerdişê zazakî de qisey kerd û dîyar kerd ke ganî zazakî warê dîjîtalî de ca bigîra.
Weşanxaneyê Vateyî Fuarê Kitaban ê Amedî yê 10. de ca girewt. Nuştox, mamosta û endamê Grûba Xebate ya Vateyî Mehmet Olmezî derheqê fuarî û muhîmîya dîjîtalîzekerdişê zazakî (kirmanckî) de qisey kerd.
Mehmet Olmezî vat ke ê sey Weşanxaneyê Vateyî beşdarê fuarî bîyî: “Şima zanê, no Fuarê Kitaban ê Amedî yo 10. o. Ma zî sey Weşanxaneyê Vateyî tîya de ca girewt. Weşanxaneyê Vateyî her serre kitabanê zazakî çap keno û roşeno; xebatanê ferheng û kovaran zî keno.”
Eleqe û wendişê kitaban kêmî bîyo
Mehmet Olmezî derheqê rewşa fuarî û wendişê kitaban de bale ante krîz û vurîyayîşê teknolojî ser o û wina dewam kerd: “Eke ma behsê fuarî bikerê, tayê bêveng vîyart. Beno ke hetê wextî ra problemê ci bibo, beno ke hetê ekonomî ra bo; la ez vana ke hetê wendişê kitaban ra kêmanîyêk bîya. Ma bi serran o tîya yê, xebitîyenê, derdê ma est o. Her serre goreyê serra verêne eleqe kitaban rê hîna kêmî beno; bi taybetî kitabanê kurdkî, yanî kirdaskî û zazakî rê, la kitabanê bînan rê zî. Yanî kitabî êdî kêmîyêr yenê wendene.”
‘Ganî zazakî warê dîjîtalî de bibo’
Mehmet Olmezî dîyar kerd ke ganî zazakî goreyê wextî xo bivurno û dîjîtal bibo: “Ganî ma zazakî zî goreyê wextî bivurnê. Nika kitabê zazakî kêmî yenê wendene. Sebebê ci xora eşkera yo: dinyaya teknolojî, dinyaya dîjîtale awan bîya. Coka ganî ma zazakî warê dîjîtalî de bikerê. Êdî her kes wextê xo telefon, tablet, televîzyon û înternetî ser o vîyarneno; gedeyî zî wextê xo uca vîyarnenê. Eke ma zazakî nêkerê mîyanê nê xebatan, do xirab bibo.”
‘Arşîvê dîjîtalî ziwanî mergî ra xelesneno’
Mehmet Olmezî derheqê ferq û muhîmîya dîjîtalîzekerdişî de hişyarî daye û wina vat: “Çîyo ke ganî ma seba zazakî bikerê, dîjîtalîzekerdişê zazakî yo. Ganî ma kitabanê xo bi hawayêko dîjîtal zî virazê; ganî ma vîdeo, kayî, û aplîkasyonan virazê. Mesela medyaya dijîtaele est a, ganî ma uca zazakî bixebitnê; ganî Facebook û Xî de zazakî bibo. Ganî nê waran de xebatî bêrê kerdene.”
‘Şima zanê, arşîvo dîjîtal qet vindî nêbeno’
Mehmet Olmezî peynîya qiseykerdişê xo de derheqê muhîmîya arşîvê dîjîtalî de wina vat: “Eke wina bibo, şansê ma zêde beno ke ma ziwanî bipawê. Şima zanê, arşîvo dîjîtal qet vindî nêbeno. Eke heme çî warê dîjîtalî de bêrê dîjîtalîzekerdene û arşîvkerdene, a game eke qiseykerdoxê zazakî kêmî bibê zî, merdişê nê ziwanî zaf-zaf zehmet beno. Rojêk, rojanê azadan de, eke çar kesî zî zazakî bizanê, merdim şêno arşîvê dîjîtalî ra heme materyalan bivîno. Homa nêkero, eke no ziwan bimiro zî, merdim şeno reyna gandar bikero.”
