Serekê Mehkemaya Berze ya Cezayanê Îraqî Hâkim Seed Lamî, eşkera kerd ke Mehkemaya Temyîz a Federalî ya Îraqî cezaya dardekerdişî ya Ecac Ehmed Tikrîtî qebul kerd. Ecac Tikrîtî bi sucdarîyanê ‘qirkerdiş, sucê vera merdimîye û destdergîya hemverê şarê başûrê Kurdîstanî’ amebi sucdarkerdene.
Serekê Mehkemaya Berze ya Cezayanê Îraqî Hâkim Seed Lamî, eşkera kerd ke Mehkemaya Temyîz a Federalî ya Îraqî cezaya dardekerdişî ya Ecac Ehmed Tikrîtî rê ameybi dayîş, qebul kerd.
Seed Lamî dîyar kerd ke badê nê qerarî, do dosyaya Ecac Ehmed Tikrîtî şêra vernîya destanê serekkomarê ke qerarî tesdîq bikero.
Ney ra ver Mehkemaya Berze ya Cezayanê Îraqî, semedê qirkerdişê vera kurdan ê hepîsxaneyê Nugre Selmanî, cezaya dardekerdişî dabî Ecac Ehmed Tikrîtî.
Celadê Enfalî Ecac Ehmed Tikrîtî kam o?
Ecac Ehmed Tikrîtî ke sey ‘Celadê Enfalî’ yeno naskerdene, serra 1962î de şaristanê Selahaddînî de maya xo ra bîyo. Serra 1986î de Kolejê Ewleyî yê Mîlî ra mezun bîyo. Wextê enfalî de rayedarê hepîsxaneyê Nugre Selman ê şaristanê Musena bi. Ê hepîsxaneyî de Ecac Ehmed Tikrîtî bi seyan metodanê cîya yê îşkenceyî vera welatijanê kurdan şuxulneno. Badê 37 serran ke operasyonê Enfalî ser o derbas bîyî, 31ê temmuza 2025î de şaristanokê Zuluîye de ame girewtiş.
Ecac Ehmed Tikrîtî semedê sucê îşkence, vêşanverdayîş, destdergîya cinîyan û sucdarîyê bînî yê şerî amebi muhakemekerdene.
