Meclîsê Cinîyan ê DEM Partî vat: “Tu zîrweya asayîşî nêeşkena vernîya talebê şaran û cinîyan ê cuya azade, seypêyî û mîyanê haştîye de pîyayîye bigîro. Asayîşê zîrweya NATO’yî ney, cinîyê ke hedefê şer û şîdetî yê, ganî bêrê pawitene.”
Eşkerayîya Meclîsê Cinîyan ê DEM Partî de ame vatene: “Tu zîrweya asayîşî nêeşkena vernîya talebê şaran û cinîyan ê cuya azade, seypêyî û mîyanê haştîye de pîyayîye bigîro.” Eşkerayîye de nînan ca girewt: “Îtîrazê ke vera zîrweya NATO’yî ya 7-8ê temmuze ke Tirkîya de yena viraştene berz benê, îtîrazê înan ê ke vera şerî haştî pawenê. Cinî û ciwanan ke seba ke nê îtîrazî berz kerdî, bi operasyonanê sodirî ameyî destbendkerdene, problemê asayîşî yê nê welatî nîyê, awankerdoxê haştî û ameyoxêko demokratîk ê.
Xercê ke verê zîrwe seba rayîran ke protokol do tira bivîyaro ameyî kerdene, delîlê nê yê ke feqîrîya xorîne ya cinîyan senî yena peygoşkerdene. Barîyerê ke ver bi rayîran ameyî antene, barîyerê ke bi krîzê ekonomîke reyde ver bi raştîya feqîrîye ya ke keyeyan û waranê cuye de asena, ameyî antene.
Îtîrazê vera NATO’yî ke qadanê ronayîşê ci de cinsîyetperestî, mîlîyetperwerî, şer û mîlîtarîzm est ê; îtîrazê vera şerî, emperyalîzmî û polîtîkayanê ke cuya hempare û seypêyî ya şaran hedef gênê. Îtîrazê ke vera zîhnîyetê pederşahî yê ke bedenê cinîyan, keda înan, heqanê înan û cuya înan hedef gêna.
Cinî her reye bîye hedefê nê polîtîkayanê şerî
Armancê esasî yê NATO’yî û îtîfaqanê ci yê leşkerîyan ê sey ci, caardişê polîtîkayanê yewîwaz, cinsîyetperest û pederşahî goreyê menfeatanê emperyalî yo. Her zîrweya ke heta nika ame viraştene, bîya bingeyêk ke polîtîkayê şerî tede reyna ameyî afirnayene û meşrû bîyî. Bitaybetî polîtîkayê şerî yê ke Rojhelatê Mîyanênî de xorîn benê, nîşanê ney ê tewr eşkera yê. Cinî her reye bîye hedefê nê polîtîkayanê şerî.
Çîyo ke nê zîrweyan de yeno esasgirewtene, asayîşê şaran û cinîyan nîyo; asayîşê sermaye, menfeatanê emperyal û polîtîkayanê şerî yo. Asayîşê înan o ke cinî û kênayan îstîsmar kenê, nameyê înan dosyayanê Epsteinî de vîyareno û mîyanê torranê sucî de yê. Coka vera nê zîrwe vejîyayîş heqêko tewr meşrû û demokratîk ê cinîyan o.
Ewro Efxanîstanî ra heta Îranî, Sûrîye ra heta Sudanî, Libnanî ra heta Tirkîya têkoşînê cinîyan ke vera hêrişanê heq, cuye û destkewteyanê cinîyan hedef gênê, berz beno, îfadeyo tewr xurt ê nê meşrûîyetî ya.
No têkoşîn ewro bi eynî zehnîyetê kapîtalîstî, bi xeyalanê emperyalan, îtîrazê bi mîlyonan cinîyan ke çar goşeyanê welatî de vera zîrweya ke Ankara de do bibo, mojna.
Ma tu destbendkerdiş û tepiştişê ke seba bêvengkerdişê nê îtîrazî ame kerdene, qebul nêkerd û nêkenê. Ruhê Vengdayîşê Haştî û Komelê Demokratîkî no yo: îtîfaqê ke şerî xemilnenê û pawenê, bi vengê cinîyan vengbîyayîşê têkoşînê azadîya cinîyan, mayaya nê ruhî esas gênê û vera nîzamê pederşahî veng berz kenê.
Problemê asayîşî yo raştikên ê nê welatî; îtîfaqê emperyalîst, kapîtalîst û dişmenê cinîyan ê ke şer û kolonî gandar kenê, cuya şaran û cinîyan hedef gênê.
Ma bi têkoşînê xo yê cinîyan ke sînoran ra vîyarena, bi piştîya xo, do vera şerî bibê, do bibê kerdoxê ronayoxî yê haştî. Asayîşê zîrweya NATO’yî nê, cinîyê ke hedefê şer û şîdetî yê, ganî bêrê pawitene!”
