Meclîsê Cinîyan ê DEM Partî Beldeya Bûlam a Semsûrî de cinîyan reyde kombîyayîşêk organîze kerd. Verfeka Meclîsê Cinîyan ê DEM Partî Halîde Turkoglu bale ante problemanê cinîyan ser o û vat: “Seba ke cinî bibê wayîrê hêzî yan zî endîşeyanê ameyoxî meciwîyê çiqas bûdçe yena xerckerdene? Ganî hesabê nînan pêrune bêro persayene.”
Meclîsê Cinîyan ê DEM Partî Beldeya Bûlam a qezaya Çelîkan a Semsûrî de cinîyan reyde kombîyayîşêk organîze kerd. Kombîyayîş Cemxaneyê Bûlamî de ame kerdene. Verfeka Meclîsê Cinîyan ê DEM Partî Halîde Turkoglu û zaf cinîyê beldeyî beşdar bîyî.
‘Cinî kede û heqê xo nêgênê’
Halîde Turkoglu tîya de qisey kerd û da zanayene ke pêdîyayîşê înan ê cinîyan reyde seba înan zaf biqîymet o û wina vat: “Hîkayeyê ma yê hemparî vejîyayî meydan, cîyayîyê ma zî asenê. Ma sey cinîyan mîyanê endîşe û tersî de yê. La eynî wext de ma hêvîye zî xurt kenê. Ma prosesêkê aştîye ra vîyarenê. Ma zanenê ke îradeyê ma yê çareserkerdişê problemî est o. Bûlam de cinî zafêr karanê citkarîye de xebitîyenê. La ma zanenê ke ê nêeşkenê keda xo bigîrê. Ma zanenê ke endîşeyê ameyoxî yewbînan ra girêdîyayê. Problemo tewr gird ke cinî pê rî bi rî manenê, feqîrbîyayîşê cinîyan o.”
‘Ganî ma hesabê feqîrbîyayîşê cinîyan bipersê’
Turkoglu bale ante krîzê ekonomîkî û feqîrîya Tirkîya ser o û wina dewam kerd: “Prosesê bûdçe vernîya ma de yo. Gelo na bûdçe çira feqîrbîyayîşê cinîyan çareser nêkena? Ganî ma bibê cewabê nê nuqtayan. Seba ke cinî bibê wayîrê hêzî yan zî endîşeyanê ameyoxî meciwîyê çiqas bûdçe yena xerckerdene? Ganî hesabê nînan pêrune bêro persayene. Eke sermîyan şarî rê nêro dayene no yeno a mana ke ê heqê ma dizdenê. Cuya birûmete de heq yeno pawitene. Ganî ma zî hesabê heqê xo bipersê. Gama ke cinî cehd kenê ke hetê ekonomîkî ra linganê xo ser o bimanê, mecbur ê karê keyeyî zî bikerê. Coka ma sey DEM Partî cehd kenê ke bibê vengê cinîyan.”
‘Ma nêwazenê karê tûtinî bikerê’
Dima cinîyê beldeyî qisey kerd, bale ante problemanê Beldeya Bûlamî ser o û vat: “Ma zî nêwazenê karê tûtinî bikerê. Ma zanenê ke tûtin çiqas zerar dano. La çimeyêkê bînî yê debarî çin o. Bûlam cayêkê qijkek o la seba ciwananê ma warêkê xebate eşkeno bêro awankerdene. Çunke nêyeno awankerdene ciwanê ma mecbur manenê ke şêrê bajaranê bînan. Ê mecbur manenê ke herra xo ra bibirîyê. Ma wazenê herra xo ser o bixebitîyê û debara xo bikerê. La no zî bi mesref o.”
Kombîyayîş bi pers û cewaban qedîya.
