Hemsereka Pêroyî ya DBP’yî Çîgdem Kiliçgun Uçar a ke Sêrt de şarî reyde ameye têhet dîyar kerd ke Rayberê Şarê Kurdî Abdullah Ocalan binê şert û mercanê tecrîdî de seba awankerdişê aştî xebatêk rayra beno û wina vat: “Ma do birêz Ocalanî masaya muzakereyî de bêkes nêverdî.”
Partîya Herêman a Demokratîkan (DBP), bi sloganê ‘Ma vatişê aştî şarî reyde awan kenî’ di rojan Sêrt de Hemsereka Pêroyî ya DBP’yî Çîgdem Kiliçgun Uçar zî mîyan de ya, ewilî Baxçeyê Çayî yê Mezopotamya de hemwelatîyan reyde ameyî têhet.
Çîgdem Kiliçgun Uçar ke kombîyayîşî de prosesî ser o qisey kerd, îfade kerd kurdî seba awankerdişê demokrasî têkoşîn rayra benêû wina vat: “27ê sîbate ra nat îradeyêko ke vejeya orte est a. Waştişê demokrasî seba kurdan waştişêko newe nîyo. Birêz Ocalan binê şert û mercanê tecrîdî de seba awankerdişê aştî xebate rayra berdo. Kifş o ke polîtîkaya 100 serran a înkar û asîmîlasyonî do nêeşka dewam bikera. Rojava de hetê hêzanê mîyanneteweyî ra şer kurdan ser o yeno ferzkerdene. Labelê sîstemê Rojava şer nîyo, ê aştî weçînenî. Awankerdişê aştî ya Tirkîya reyde zî mumkin a. No pê gamanê bicesaretan yeno viraştene. Birêz Ocalan roja 27ê sibate de veng da. Na game seba ke herinda çekan de rayîrê bingeyê sîyasetê demokratîkî akerde bibo, ameye eştene. Birêz Ocalan kombîyayîşê xo yê peyêne de vatbi ‘Seba ke komelê bi kîn û hêrs bieşkê bîbedilîyê, lazimtî bi rûmet û fikranê exlaqî yê zaf pîlan est a.’ Polîtîkaya 100 serran a înkar û asîmîlasyonî bîye sebebê qrîzêko xorîn ê rayberîye.”
‘Ma do Birêz Ocalanî maseya muzakereyî ser o tena nêverdî’
Çîgdem Kiliçgun Uçar dewamê qiseykerdişêxo de bale ant serê muzakereyanê seba aştî û têgêrayîşê ke yenî rayraberdene û wina dewam kerd: “Hetê aqilê dewlete ra herinda nêzdîbîyayîşê se serran ê înkar û îmhayî de, eştişê gamanê demokratîkan lazimtîyêka lezgîn a. Ganî qerarê DMME’yî bêrê caardene. Rewşa girewteyanê nêweşan zî eyn hawa ya. Seserra newa ya nê welatî girêdayeyê gamanê bicesaret o ke dewlete do bierza. Ma do Birêz Ocalanî maseya muzakere ser o tena nêverdî. Ma do mîyanê têgêrayîşêkî de bibê ke nê gaman dewlete rê bidê eştiş. Çarçewaya naye de ma 4 mîtînganê pîlan organîze kenî. Seba azadîya fîzîkî ya birêz Ocalan û eştişê gamanê demokratîkan, ma do meydanan de bibê. Ma do ameyoxê demokratîk ê nê welatî pîya awan bîkerî.”
Newala Qesaba
Hemwelatîyanê ke tewrê kombîyayîşî bîyî zî fikrê xo yê prosesî ser o îfade kerdê. Hemwelatîyan qiseykerdişê xo de bale ant serê nê xusûsî ke ganî dewlete Newala Qesaba reyde rî bi rî bêra. Hemwelatîyan dîyar kerd ke ganî dewlete lez gamanê laziman bierza.
Zîyaretê heyetê DBP’yî yê mîyanê şaristanî de dewam kenî.
