Programê DBP’yî yê ‘Ma vatişê aştî şarî reyde awan kenî’ de ke Semsûr de dewam kerdêne, ewro dewa Çokpîngarî ya qezaya merkezî de qedîya. Kombîyayîşî de ame vatene ke kurdî rayberê demokrasîyî yê û dîyar kerd ke berê aştî yeno manayê akerdişê berê Îmralîyî.
Kombîyayîşê şarî yê DBP’yî ke bi sloganê ‘Ma vatişê aştî şarî reyde awan kenî’ Semsûr de ameyêne viraştene, roja peyêne de dewa Çokpîngarî de ame kerdene. Kombîyayîşo ke Hemsereka Pêroyî ya DBP’yî Çîgdem Kiliçgun Uçar û heyeto ke aye reyde bi beşdar bi, rastê eleqeyêko pîl ame.
Kombîyayîşê şarî yê dewa Çokpîngarî seba vîrardişê kesanê ke têkoşînê azadîye de dinyaya xo bedilnaya, bi deqîqeyêk rêzgirewtişî dest pê kerd. Wextê rêzgirewtişî de welatîyan bêmabên sloganê ‘Şehîd namirin’ vat.
‘Kurdî pêşengê demokrasîyî yê’
Badê rêzgirewtişî Hemsereka Pêroyî ya DBP’yî Çîgdem Kiliçgun Uçar prosesî ser o erjnayîşî kerdî û dîyar kerd ke amanco tekane yê têkoşînî no yo ke nê welatî de her kokê etnikî û bawerîyî bi hawayêko weş pîya biciwîyê û wina qisey kerd: “No welat hetê komelî ra tu wext nêbî dewlet-netewe û do nêbo zî. Rîyê nê polîtîkayanê yekperestan ra her kesî welat verda, ameyî girewtene. Labelê na seserre de kurdan bi têkoşînê xo yê birûmet vejîyayî û ewro wazenê encam bigîrê. Dewlete bi israr vana ‘Tirkîyaya bêterore’, labelê çimê komelî de no proses Prosesê Komelê Demokratîkî yo. Kamcîn game ke têgêrayîşê kurdan eştî, seba ke dewlete gamanê bicesaretan bierza bîyî. Heme hêzê hegemonîk nêwazenê kurdî Rojhelatê Mîyanênî de bihêz bibî. Labelê wa ney bîzanî ke kurdî êdî hîna zaf bîhêz ê û pêşengê demokrasîyî yê.”
‘Berê aştî akerdişê berê Îmralîyî yo’
Çîgdem Kiliçgun Uçar bale ant tecrîtê Rayberê Şarê Kurdî Abdullah Ocalanî ser o û nê çîyî vatî: “Kurdî nika pêşengîya demokrasîyî kenê û na dewlete ra vanê demokratîk bibe. Êdî Rojhelatê Mîyanênî yo bêkurd mumkin nîyo. Birêz Ocalan, embazê ma yê ke ewro zereyê ma de nîyê û şarê ma îdeala demokratîk a nê welatî resnaye na seserre. Kurdan wexto ke têkoşîn kerd senî bi weş nêzdî bîyî, wextê awankerdişê aştîye de zî do eynê weşîye de nêzdî bibî. Muzakereyêko winasîn ê tarîxî tena meseleyêka mabênê kurdan û AKP’yî de nîyo. No muzakereyê ameyoxê ciwan, cinî û her kesî yo ke tede yeno qiseykerdene û vatene. Berê aştî yeno manayê akerdişê berê Îmralîyî, berê aştî yeno manayê agêrayîşê her kesê ke mecbur mende şîyê surgun.”
‘Ma aştî wazenî’
Badê qiseykerdişê Çîgdem Kiliçgun Uçar, welatîyê ke beşdarê programî bîyî prosesî ser o qisey kerd. Dayîkeyêka ke di domanê xo têkoşîn de vîndî kerdê, wina vat: “Ma êdî nêwazenî gonîya tu kesî birişîya, ma aştî wazenî.”
Dayîkeyêka bîn a ke tewrê kombîyayîşî bîbî dîyar kerd ke ê êdî nêwazenê gonî birişîya û nê çîyî vatş: “Ma wazenî Rayberê ma bêro veradayene. Ma wazenî aştî bêra.”
Dayîkeyêka bîne zî dîyar kerd ke ê wazenê mezelê domananê înan ê ke têkoşînê azadîye de dinyaya xo bedilnaya est bî û nê çîyî vatî: “Ma mezelê domananê xo wazenî. Semedê nê ra zî ma aştî her çîyî ra hîna zafêr wazenî û hêvî kenî ke aştî lez bêra.”
Welatîyêko bîn zî bal ant têkoşînê Şehîd Mazlum Doganî ser o û wina vat: “Ma verê dayo na dewa. Ma soz dayo Mazlum Doganî, çunke Mazlum Dogan embazê Ocalanî yo.”
Kombîyayîş bi tilîlî û çepikan qedîya.
