Badê peymane û adirbest hetê Ahmed Şara ra ame resnayîş çimî rayra yê ke ewro Fermandarê Pêroyî yê HSD’yî Mazlum Ebdî Serekê HTŞ’yî Ahmet el-Şara reyde bêro têhet. Yeno pawitene ke detayanê peymane û adirbestî ser o bêro qisey kerdene.
Hêrişê çeteyanê HTŞ’yî SMO û DAIŞ’yî yê bi piştgirîyê Tirkîye û Qatarî vera Rayberîya Xosere ê Vakur û Rojhelatê Sûrîye ser o xoverdayîşê HSD’yî ca bi ca dewam keno. Seba vindertişê hêrişan hewteyêk o bi mabênkarîya DYA’yî pêvînayîşê dîplomatîkî dewam kenê û kombîyayîş yenê viraştene. Tewr peynî 17ê çeleyî de Fermandarê Pêroyî yê HSD’yî Mazlum Ebdî, Serekê PDK’yî Mesud Barzanî û temsîlkarê taybet ê DYA’yî yê Sûrîye Tom Barrack Hewlêr de ameyê têhet.
Ebdî do detayan munaqeşe bikero
Wextêko netîceyê kombîyayîşê Hewlêrî ameyne meraqkerdene de Şara adirbest û peymanêka ke mabênê hetan de ameya qebûlkerdene îlan kerde. Saetane erey ê şewe de Fermandarê Pêroyî yê HSD’yî Ebdî eşkerayîyêk daye çapemenî û îfade kerd ke bi amancê vindarnayîşê şerêko gird peymanê viraşta. Ebdîyî da zanayîş ke seba qiseykerdişê detayan do 19ê çele de şêro Şam.
‘Hema xeylê madeyî nezelalî est ê’
Pispor û çimeyê herême vanê ke vera eşkerayîya adirbest û peymane zî hema xeylê madeyê nedîyar û ne zelalî est ê. Çimeyan bale ant hêriş û komployanî ke vera kurdan yenê averberdene ser o û wina vat: “Rixmê konseptê mîyanneteweyî zî Rayberîya Xosere do destkewteyanê xo bipawa. Seba nê lazimtî bi zelalkerdişê detayan û munaqaşeyî est a. Ewro na rewşe û nêzdîbîyayîşê Şara do zelal bibo.”
‘Proseso zehmet ê entegrasyonî dest pêkeno’
Heto bîn ra vizêrî Temsîlkarê Taybet ê DYA’yî yê Sûrîye Tom Barrackî zî bi eşkerayîyêk peymane sey pêameyîşêko pozîtîf pênase kerd. Barrackî eşkera kerdbî ke proseso zehmet ê entegrasyonî dest pêkeno û wina vat: “DYA’yî seba ke proses bi rehetî aver şêro heta peynî do hewl bido.”
Grahamî persî Barrackî ra kerdî
Senatorê Partîya Komareperwere Lindsey Grahamî zî hesabê xo yê fermî ser o mesajêk weşana û wina vat: “Derheqê detayanê peymane de qet agahîya mi û senatoranê bînan çinî ya. Wexto ke na peymane ameya viraştene kamcîn hetan reyde mişewre ameyo kerdene? Têkoşînê vera DAIŞ’î do bi çi hewayî bêro kerdene? Derheqê peymane de fikrê Îsraîlî ameyo girewtene? Xeylê madeyê nezelalî est ê ke ganî bilez agahdarîyê ci bêrê kerdene.”
