Fermandarê Pêroyî yê HSD’yî Mazlum Ebdî dima ke Şamî ra agêra, fotografêko ke destê ey de çek est o ame vilakerdene û mesajê xoverdayîşî da raya pêroyî ya Kurdîstanî û dişmenî ke hêrişê Rojavayê Kurdîstanî kenê.
Fermandarê Pêroyî yê HSD’yî Mazlum Ebdî vizêr bi munasebetê pêvînayîşê Serekê HTŞ’yî Ahmet Şara şi Şam. Goreyê agahîyanê ke çimeyanê Rojava ra ameyê girewtene; Şarayî cehd kerdo ke waştişanê Tirkîya Rayberîya Xosere rê ferz bikero. Çimeyan vat ke Şara waşto Rayberîya Xosere xo bi temamî vila bikera û heme sazgehan teslîmê çeteyanê Şamî bikero.
Ebdî cewabê ‘ez şona çek gêna’ da Şara
Çimeyanê herême îfade kerd ke dima ke Fermandar Ebdî resayo Rojavayê Kurdîstanî çekê xo yê M16 girewto destê xo û fotograf anto. Çimeyan vat ke no fotograf ame vilakerdene û bi nê çîyî mesajê do hîrê hetan û nê çîyî vat: “Mesajo sereke raya pêroyî ya Kurdîstanî rê no bi. Ebdî verî ke şêro Şam vatbi, ‘ma do heta peynî heqanê xo bipawê.’ Şi Şam û Şara reyde qisey kerd. Ebdîyî waşt ke heme heqê kurdan ê Rojava bêrê qebulkerdene. Bi girewtişê ê çekî mesajê, ‘bi dîyalogî heqê kurdan qebul nêkerdê, dora çekî ya.’ Sewbîna qerardarîya xo ya xoverdayîşî eşkera kerde.”
Mesajê ‘şer paweyê şima yo’ da çeteyan
Goreyê çimeyan mesajo dîyin zî da dişmenanê Kurdîstanî ke nika hêriş kenê. Ebdîyî bi parekerdişê fotografî heme dişmenan ra vat ke beno ke îmkanê ma zaf nêbî la şima do her tim hemverê xo de xoverdayîşî bivînê. Çimeyan îfade kerd ke mesajo hîrêyin zî seba hêzanê mîyandewletî yê Kurdîstanî bi ke ser o kayan kay kenê, o bi. Ebdîyî bi nê fotografê înan ra zî vat ke îradeyê şarê kurdî teslîm nêyeno girewtene.
