Fermandarê Pêroyî yê HSD’yî Mazlum Ebdî dîyar kerd ke, pêvînayîşê înan ê Nêçîrvan Barzanî û Tom Barrackî reyde, babeta entegrasyonê HSD û Rayberîya Xoser a mîyanê sazgehanê Sûrîye de ameyê erjnayene.
Vizêr Hewlêr de, bi tewrbîyayîşê Serekê Herêma Kurdîstanî Nêçîrvan Barzanî, Fermandarê Pêroyî yê HSD’yî Mazlum Ebdî û Temsîlkarê Taybet ê Sûrîye yê Serekê DYA Tom Barrackî kombîyayîşêk ame viraştene.
Fermandarê HSD’yî Mazlum Ebdî derheqê detayanê pêvînayîşî de platformê X’î ser o eşkerayîyêk daye û nê çîyî vatî: “Ma bi taybetî, gamê ke seba entegrasyonê tifaq û hêzanê ma û Rayberîya Xoser a mîyanê hukmatê Sûrîye de qisey kerd û prosesê caardişê pêkerdişan erjna. Ma hêvî kenî ke no proses, çareserîya sîyasî û îstîqrarî hîna xurt bikero.”
Mazlum Ebdî wina vat: “Ma paştîdayîşê xo yê seba cehdanê têkoşînê vera terorî û averşîyayîşanê çareserîya sîyasî ya hîra ya mîyanê Sûrîye de new ra îfade kerd.”
Mazlum Ebdî bal ant serê rolê paştîdayox ê başûrê Kurdîstanî ke seba bîdestvistişê îstîqrarê herêmî û averşîyayîşê dîyalogî ke mabênê hetan de kay kerdo û mojna ke nê xebatî xizmetê asayîş û aştîya herêmî kenî.
